Кæсæг-Балхъары ацæуæг Цæгат Кавказы «Кинокавказ-2026» фæсивæдон кинофестиваль æхгæныны кадæн арæзт æмбырды рæстæг не ’мзæххонтæ Чъерджиаты Индирæ æмæ Битарты Ангелинæйæн раттой амынд республикæйы культурæйы министр æмæ Налцыччы администрацийы сæргълæууæджы Бузны фыстæджытæ.
Не ’мзæххон сылгоймæгтæн хæрзиуджытæ саккаг кодтой Цæгат Кавказы кинематографы райрæзтмæ аккаг æвæрæн бахæссыны, стæй регионты ‘хсæн культурон ахастдзинæдтæ аразыны хъуыддаджы разæнгардæй архайыны тыххæй. Æрыгон режиссерты куыстытæ иртасæг Чъерджиаты Индирæйы бахастой фестивалы жюрийы уæнгты номхыгъдмæ, Битарты Ангелинæ та хуынд раныхасгæнæджы уагæй фестивалы архайджытæн бакаст лекци «Каждый сам себе продюсер. Шаг за шагом – к цели».
Кинематографийы æппæтуæрæсеон паддзахадон институт (ВГИК) кастфæуæвæг, киноиртасæг æмæ документалист Индирæ дзæвгар рæстæг бакуыста Цæгат Кавказы кинохроникæйы студийы, систа кинонывтæ «Зори Кавказа», «Кандагар. Пятая рота», «Еще раз о войне и мире». Ангелинæ у сценарист, систа æфсæддон драмæ «Выжить нельзя погибнуть» (ацы кинонывæн саккаг кодтой уæрæсейаг фестивальты дыууæ Гран-прийы) æмæ документалон киноныв «Нарты. Театр вопреки».
Хуасдзауты Алинæ
