РЦИ-Аланийы Сæргълæууæг Сергей Меняйло æмæ Æнæххæст бæрнондзинады организаци «Яндекс»-ы æхсæнад æмæ паддзахадон хицаудзинады оргæнтимæ бастдзинады директор Александр Болховитянов бафыстой фидыды бадзырд Цæгат Ирыстон æмæ «Яндекс»-ы ‘хсæн æмгуыстады тыххæй. Уымæй уæлдай ма баныхас кодтой, ирон æвзаджы нымæцон рæзтыл чи фæзындзæн, къорд ахæм здæхтыл.
Бадзырд бафыстой Мæскуыйы, «Яндекс»-ы штаб-квартирæйы 21-22 майы стратегион сесси «Информацион технологитæ æмæ Уæрæсейы адæмты æвзæгтæ»-йы фæлгæты. Æмгуыстады руаджы архайд цæудзæн ирон æвзагæй парахатдæр пайда кæныныл Яндексы нырыккон сервистæ, продукттæ æмæ технологитæй, стæй ирон æвзагæй æмæ ирон æвзагмæ машинæтæй тæлмацты æмвæзад фæбæрзонддæр кæныныл.
– Абоны бадзырды бафыст фæпайда уыдзæн æвзаджы корпустæ, тексттæ, дзырдуæттæ, глоссаритæ, орфографион æмæ терминологон æрмæджытæ аразынæн. Уыцы бæрæггæнæнтæ æнæмæнг хъæугæ сты тæлмацгæнджыты рæзтæн, ахуыргæнæн сервистæн, дзурæн технологитæ æмæ æндæр нымæцон инструменттæн, – фæбæрæг кодта Сергей Меняйло.
Сæрмагонд цæстдард уыдзæн ирон æвзагыл документтæ æмæ, нывтыл цы тексттæ вæййы, уыдон, ныхас, автоматикон субтитртæ, кадры фæстæ ныхас, аудио- æмæ видеоæрмæджытæ иртасынмæ.
Æмгуыстады бындурыл куыст цæудзæн ахуырад, культурæ æмæ туризмы къабазы. Бæлвырддæр зæгъгæйæ, ныхас цæуы Цæгат Ирыстоны картографион, топонимикон, туристон æмæ культурон контенты рæзты тыххæй, нырыккон уагыл рацаразын объекттæ, маршрутты тыххæй информаци æмæ сæ нæмттæ дыууæ ‘взагыл.
Ирон æвзаджы нымæцон рæзты фонд дæр архайдзæн æмгуыстады бындурыл æвзаджы бæрæггæнæнтæ, корпустæ, тæлмацтæ, дзырдуатон æмæ терминологон æрмæджытæ экспертон æгъдауæй басгарыны бæрнон хъуыддагыл.
Уымæй уæлдай ма Сергей Меняйло архайдта стратегион сесси «Суверенный ИИ: сохранить общий культурный цивилизационный код и обеспечить безопасность данных»-ы пленарон æмбырды. Цæгат Ирыстоны Сæргълæууæг скодта доклад «Ирон æвзаг – нырыккон бастдзинад, ахуырад, медиа æмæ фидæны технологиты æвзаг», фæбæрæг дзы кодта уыцы фæткы ахсджиагдзинад республикæйæн. Регионы разамонæг загъта, ирон æвзаджы рæзт нымæцон фалдзусы кæй сси æвзаг бахъахъхъæнын, æрыгон фæлтæры ‘хсæн æй парахат кæнын æмæ йæ нырыккон технологитыл бафтауыны хай.
Докладтæ ма скодтой Адæмыхæттыты хъуыддæгты агентады разамонæг Игорь Баринов, Уæрæсейы Адæмты хæдзары директор Анна Полежаева, Уæрæсейы Федерацийы Адæмты мадæлон æвзæгты федералон институты директор Эсет Бокова, Цæгат Ирыстоны Хетæгкаты Къостайы номыл паддзахадон университеты ахуыргæнæг, РЦИ-Аланийы истори æмæ археологийы ирон æвзаджы центры наукон кусæг Мария Макаренко (темæ – «Ирон æвзагыл ахуыргæнæн хъæзтыты портал Рудзынг.рф»), Автономон æнæкоммерцион организаци «Ирон æвзаджы нымæцон рæзты фонд»-ы генералон директор Гуыдиаты Тимур (темæ – «Корпусæй системæмæ: ossetic.ru куыд æвзаджы рæзты нымæцон платформæ»).
III Стратегион сесси «Информацион технологитæ æмæ Уæрæсейы адæмты æвзæгтæ» цыди 2026 азы 21-22 майы Мæскуыйы Уæрæсейы Адæмты иудзинады азы фæлгæты.
РЦИ-Аланийы Сæргълæууæг æмæ Хицауады пресс-службæ
