Знон РЦИ-Аланийы Нывгæнджыты цæдисы равдыстыты залы байгом сфæлдыстадон равдыст «Дзæуджыхъæу аивадон тыгъдады». Проект арæзт у РЦИ-Аланийы Архитектурæйы азы фæлгæты.
Равдысты æрмæст Дзæуджыхъæуы аив архитектурон объекттæ æвдыст нæ цæуынц, фæлæ æппæт Ирыстоны фæдзæхст бынæттæ æмæ æрдзы рæсугъддзинæдтæ.
Экспозицийы æвæрд сты, куыд зындгонд, фæлтæрдджын авторты, афтæ, нывкæнынады аивады фыццаг къахдзæфтæ чи кæны, уыцы æрыгон авторты куыстытæ дæр, æмæ дзы фенæн ис Дзæуджы-хъæу æмæ республикæмæ сæ цæстæнгас æмæ ахаст – пейзажтæ, архитектурон фæлгонцтæ нырыккон аивадон æмбарынады. Æвдыст дзы цæуы горæт Кавказы хæхты рæбын, алы дугты фæстиуджытæ агъуыстыты хуызы, Терчы фæлгонц йæ алфамбылай æрдзимæ.
Цæгат Ирыстон рагæй-æрæгмæ разæнгард кодта культурæйы архайджыты. Дзæуджыхъæуы кой ссарæн ис А.С.Пушкины, М.Ю. Лермонтовы, Л.Н.Толстойы фыстыты, йæ сурæт та – XIX æнусы нывгæнджытæ Григорий Гагарин, Александр Дьяконов, Богдан Виллевальде æмæ Николай Каразины куыстыты. Стыр æвæрæн ацы хъуыддагмæ бахаста нæ горæты райгуырæг Артем Кациян дæр: йæ нывты фенæн ис бынæттон колорит æмæ социалон-историон ивддзинæдтæ XX æнусы фыццаг æрдæджы. Абон уыцы традицитæ дарддæр хæццæ кæнынц æрыгон нывгæнджытæ, сæ куыстыты ирдæй æвдисынц республикæйы рæзт, историон объекттæ æмæ нырыккон архитектурон уынаффæтæ.
Равдыстмæ аивадуарзджыты бон лæвар æрбацæуын у æрвылбон райсомы дæс сахатæй изæры æхсæз сахаты онг.
ГАПБАТЫ Алетæ
