Мæскуыйы дарддæр йæ куыст кæны XII чингуыты фестиваль «Сырх фæз». Арæзт цæуы 2015 азæй æмæ баст у А.С.Пушкины гуырæнбонимæ.
Мæскуыйы цæрджытæ æмæ уазджыты уарзон бæрæгбон æрбаиу кæны фысджыты, поэтты, рауагъдæдтæ æмæ библиотекæты кусджыты, актертæ æмæ режиссерты, музыкантты æмæ, кæй зæгъын æй хъæуы, дæсгай мин чиныгуарзджыты. Æрвылаз фестивалы фæархайы 400 рауагъдадæй фылдæр Уæрæсейы алы регионтæй. Программæ вæййы хъæздыг, барухс кæны уазджыты зæрдæтæ 800 алыхуызон цауæй – ам бакæсæн ис нæ бæстæйы хуыздæр театрты спектакльтæм, литературон-музыкалон равдыстытæ, ног чингуыты презентацитæ, авторты автограф-сесситæ æмæ ма раст дунейы чемпионатмæ дæр тагъд кæсынæй!
Чингуыты марафон цæуы 16 фæзыл: «Аивадон литературæ», «Поэзи», «Сывæллæтты æмæ ахуырадон литературæ», «Нон-фикшн», «Уæрæсейы регионтæ æмæ Республикæ Беларусь», «Чысыл сценæ», «Библиотекæ», «Музейон хахх», «Комикстæ», «Антикварон æмæ букинистон чиныг», «Фыдыбæстæйы истори», «Уæрæсейы Фысджыты цæдис», «Литературон уазæгуат», лектори «Чиныджы фидæн», «Сырх зал» æмæ «Сæйраг сценæ».
Фестивальмæ йæ арфæ æрбарвыста Уæрæсейы Федерацийы Президент Владимир Путин. Бакасти йæ Уæрæсейы Президенты æххуысгæнæг, Уæрæсейы æфсæддон-историон æхсæнады сæрдар Владимир Мединский.
Куыд æрвылаз, афтæ та ныр дæр Ирыстонæй Мæскуымæ ацыд стыр делегаци – рауагъдад «Ир», журналтæ «Мах дуг», «Ирæф», «Дарьял», «Ногдзау»-ы разамонджытæ æмæ кусджытæ. Нæ бæстæйы кадджындæр фæзы равæрдтой сæ продукци. Нæ редакци-йæн куыд фехъусын кодтой, уымæ гæсгæ мæскуыйæгтæ æмæ уазджытæ сæ иувæрс-ты нæ цæуынц, фæрсынц, æлхæнынц, арфæ кæнынц ирыстойнæгтæн. Цымыдисаг фембæлдтытæ поэттæ, фысджытæ, аивад æмæ культурæйы кусджытимæ, хъомысджын ныхас – алцæмæн дæр ис бынат фестивалы. Ирд æнкъарæнтимæ æнхъæлмæ кæсæм нæ делегацийы уæнгтæм.
ГАПБАТЫ Алетæ
