Знон уыд Республикæ Цæгат Ирыстон-Аланийы Парламенты Советы радон æмбырд. Амыдта йæ Парламенты Сæрдар ТУСКЪАТЫ Таймураз.
Депутаттæ æркастысты æмæ равзæрстой республикæйы социалон-экономикон æмæ æхсæнадон-политикон цардимæ баст республикон закъонты проекттæ æмæ закъонæвæрынадон хъæппæристæ.
Парламенты закъонæвæрынады, закъонад æмæ бынæттон хиуынаффæйады комитеты сæрдар Черчесты Аслан æркæсынмæ цы закъонты проекттæ рахаста, уыдонæй иу уыд «Республикæ Цæгат Ирыстон-Аланийы муниципалон сконд горæт Æрыдонæн «Æфсæддон намысы цæрæн бынат»-ы кадджын ном раттыны тыххæй» Республикæ Цæгат Ирыстон-Аланийы закъоны проект. Ахæм курдиатимæ Парламентмæ бахатыд Æрыдоны районы Минæвæртты æмбырд. Ацы кадджын ном лæвæрд цæуы Фыдыбæстæйы Стыр хæсты Уæлахизмæ, стæй республикæйы æхсæнадон, экономикон, политикон æмæ культурон цардмæ стыр бавæрæн бахæссыны тыххæй.
Советы уæнгтæ æркастысты «2025 азы Республикæ Цæгат Ирыстон-Аланийы республикон бюджет сæххæст кæныны тыххæй» Республикæ Цæгат Ирыстон-Аланийы закъоны проектмæ. Уый фæдыл раныхас кодта Парламенты бюджеты, хъалонты, исбонад æмæ кредитон организациты комитеты сæрдар Хæдарцаты Аслæнбег. Куыд загъта, афтæмæй закъоны проектæн уыд æхсæнадон байхъуыстытæ, фиппаинæгтæ йæм нæ разынд. Афтæмæй, 2025 азы бюджеты бæрæггæнæнтæ рауадысты ахæм: æфтиæгтæ – 52 миллиарды æмæ 244 милуан сомы, хæрдзтæ – 56 миллиарды æмæ 026 милуан сомы, бюджеты кадавар – 3 миллиарды æмæ 779 милуан сомы.
Хæдарцаты Аслæнбег ма æркæсынмæ рахаста 2025 азы фыццаг квартæлы Республикæ Цæгат Ирыстон-Аланийы республикон бюджет сæххæст кæныны тыххæй дзуаппон документ. Уым амынд æрцыдысты афæдзы фыццаг æртæ мæйы бюджеты бæрæггæнæнтæ: æфтиæгтæ – 12 миллиарды æмæ 376 милуан сомы, хæрдзтæ – 12 миллиарды æмæ 084 милуан сомы, афтæмæй, 291 мин сомæй фыццаг квартæлы бюджет рауад æфтиагджын.
«Республикæ Цæгат Ирыстон-Аланийы зæххы ахастытæн уаг дæттыны хицæндзинæдты тыххæй» Республикæ Цæгат Ирыстон Аланийы Закъонмæ ивддзинæдтæ бахæссыны тыххæй» Республикæ Цæгат Ирыстон-Аланийы закъоны проект æркæсынмæ рахаста Парламенты зæххы æмæ аграрон политикæйы, экологи æмæ æрдзон фæрæзты комитеты сæрдар Качараты Олег. Нæ республикæйы, уæлдайдæр йæ хæххон ран зæххыты кадавардзинад нымайгæйæ, документ у тынг ахсджиаг, уымæн æмæ кæрон æвæры зæххы ахастыты къабазы фыдгæнæн цаутæн æмæ зæххытимæ баст фыдракæндтæн, зæххы ахастытæ æргом бындурыл арæзт цæмæй цæуой, уымæн кæны фидар бындуртæ.
Социалон нысаниуæджы закъонты проектты фæдыл ныхас кодта Парламенты социалон политикæйы, æнæниздзинад хъахъхъæнынад æмæ ветеранты хъуыддæгты фæдыл комитеты сæрдар Реуазты Ларисæ. Документтæ нывыл кæнынц республикæйы цæрæг граждæнты æнæниздзинад, уыимæ, сывæллæтты сыгъдæг удварн æмæ се ‘нæниздзинад бахъахъхъæныны бындуртæ, сывæллæтты æвæгæсæгдзинад æмæ се ‘хсæн барадхалæн цаутæ профилактикæйы мадзæлттæ амонынц сывæллæтты къамисты куысты фæтк.
Реуазты Ларисæ ма ныхас кодта «Сидзæрæй æмæ æнæ ныййарджыты æвджид баззайæг сывæллæттæн социалон æххуысы уæлæмхасæн зæрдæдарæнты тыххæй» Республикæ Цæгат Ирыстон-Аланийы Закъонмæ ивддзинæдтæ бахæссыны тыххæй» Республикæ Цæгат Ирыстон-Аланийы закъоны проектыл. Уæлæмхасæн æххуысы мадзæлттæ, уыимæ, лæвар юридикон æххуысæй пайда кæнын кæмæн æмбæлы, адæмы уыцы къордтæм ма хаст цæуынц, астæуккаг кæнæ уæлдæр ахуыргæнæндоны ахуыр кæныны рæстæг сидзæрæй кæнæ æнæ ныййарджыты æвджид чи баззад, уыцы æнахъомтæ.
Советы уæнгтæ ма цы закъонты проекттæ равзæрстой, уыдоны фæдыл ныхас кодтой Парламенты профилон комитетты сæрдартæ Остъаты Георги, Елена Князева, Джиоты Георги.
Уымæй уæлдай, Советы уæнгтæ сфидар кодтой æвдæм равзæрст Парламенты радон æмбырды боны фæтк æмæ йæ саразыны æмгъуыд.
ДЕДЕГКАТЫ Зæлинæ
