РЦИ-Аланийы Хицауады Сæрдар видеобастдзинады руаджы архайдта, Уæрæсейы Федерацийы Хицауады Сæрдары хæдивæг Дмитрий Патрушевы разамындæй зынгсирвæзтытæй тæссаг рæстæджы фæстиуджыты тыххæй цы æмбырд уыд, уым.
Æмбырды ма архайдтой Уæрæсейы æнæнхъæлæджы уавæрты министр Александр Куренков, Уæрæсейы Федерацийы æрдзон фæрæзтæ æмæ экологийы министр Александр Козлов, «Рослесхоз», «Росводресурс», «Росгидромет» æмæ иннæ дзуапдæтæг ведомствæты разамонджытæ, стæй регионы сæргълæуджытæ.
– Зынгсирвæзтытæй тæссаг уалдзыгон афон кæронмæ æрхæццæ. Зæгъын æмбæлы, 2025 азимæ абаргæйæ, ныртæккæ зынджы азары чи бахауд, уыцы фæзуæттæ æртæ хатты чысылдæр сты. Сæйрагдæр та у, адæймаг æмæ инфраструктурæйы зиантæ не ‘руадзын къухы кæй бафтыд. Цы мадзæлттæ арæзт æрцыд, уыимæ, æппæтуæрæсеон штабы архайды фæлгæты дæр, уыдоны руаджы æрдзон зынгсирвæзтытæ анхъæвзын нæ бауагътам, – загъта Дмитрий Патрушев.
Зынгсирвæзтыты афон кæронмæ нæма ахæццæ. «Рослесхоз» алы федералон зылды дæр, бынæтты уавæрмæ йæ цæст чи дары, ахæм штабтæ снысан кодта. Дмитрий Патрушев сын бахæс кодта иудадзыг æмбырдтæ аразын зынгсирвæзтыты рæстæджы кæронмæ. Уымæй уæлдай, Президенты æххæстбарджынты сæрмагонд къамисты æрвылбоны мониторинг дæр хорзæрдæм зыны ведомствæты æмгуыстадыл ацы ахсджиаг хъуыддаджы.
Вице-премьер «Росгидромет»-æн бахæс кодта, куыд гæнæн ис, афтæ тагъд æмгъуыдмæ дзуапдæттæг оргæнтæн ахсджиаг прогнозтæ хъусын кæнын. Регионтæ та сæхи рады хъуамæ оперативон æгъдауæй тох кæной алы зынгсирвæзтимæ дæр. Уæлдай цæстдард хъуамæ уа, Уæрæсейы Федерацийы субъекттты арæхдæр кæм цæуы ахæм зынгсирвæзтытæ, уыцы бынæттæм. Дмитрий Патрушев бафæдзæхста регионты профилактикон мадзæлттæ аразын хъæдмæ хæстæг энергетикæйы, транспорты, социалон инфраструктурон объекттæ æмæ хъæууонхæдзарадон зæххытыл. Уымæй уæлдай, ахсджиаг хъуыддаг у зынгсирвæзтыты ныхмæ мадзæлттæ аразын Уæрæсейы æфсæнвæндаг, «Россети» æмæ «Росавтодор»-ы дæлхайæдты фæзуæтты.
Æмбырды хатдзæгтæм гæсгæ, Дзанайты Барис куыд загъта, афтæмæй 10 мартъийы Цæгат Ирыстоны цы зынгсирвæзтыты афон райдыдта, уый агъоммæ æппæт хъæугæ мадзæлттæ арæзт æрцыдысты. Регионы Сæргълæууæг Сергей Меняйло стыр æргом здахы ацы ахсджиаг хъуыддагмæ. Куыд фарон, афтæ ацы аз дæр Уæрæсейы Федерацийы хъæды фонды республикæйы фæзуаты иу зынгсирвæзт дæр не ‘рцыд.
– Ландшафтон зынгсирвæзтыты ныхмæ арæзт æрцыд, 900 адæймаджы кæм ис, ахæм къорд, æмæ цæттæ сты 30 техникон иуæджы. Хъæды зынгсирвæзтыты ныхмæ – 1 800 специалистæй фылдæр æмæ 260 машинæйы. Федералон проект «Æнæпилотон авиацион системæтæ»-йы фæлгæты хъæды тыгуыр фæзуæттæм цæст дарынмæ æлхæд æрцыд хъæугæ ифтонггæрзтæ. Видеоцæстдардæн уæлæмхасæн стационарон камерæтæ балхæдтам. Сæрмагонд станцæ æххæст у зынгсирвæзтыты ныхмæ тохгæнæн техникæйæ, – загъта республикæйы Хицауады Сæрдар.
Республикæйы арæзт æрцыдысты хæххон фæзуæтты зынгсирвæзтыты ныхмæ ахуыртæ, архайдтой дзы хъæдæй пайдагæнæг æмæ дзуапдæттæг организацитæ. Регионалон диспетчерон службæ æнæкъуыхцытæй кусы. Рагагъоммæ артдзæстытæ сбæрæг кæныны тыххæй рад хаст цæуы бæрæгбæттæ æмæ æмæ фæлладуадзæн бонты.
РЦИ-Аланийы Сæргълæууæг æмæ Хицауады пресс-службæ
