Цæгат Ирыстоны Хетæгкаты Къостайы номыл паддзахадон университеты концертон залы арæзт кадджын æмбырды рæстæг педагогон курсытæ фыццаг хатт кастфæуæвæг адæмæн æвдисæндартæ раттой.
Дзыллон мадзалы архайдтой ахуыргæнæндоны разамонджытæ, факультетты декантæ, «Уæрæсейаг студентон къордты» минæвæрттæ, стæй ахуыргæнджытæ æмæ студенттæ. ЦИПУ-йы ректор Огъуаты Алан проекты архайджытæн ахуырад æнтыстджынæй фæуыны фæдыл раарфæ кодта.
– Нæ ахуыргæнæндоны студентон къордтæ кæй æндидзынц, уымæн ис стыр ахадындзинад. Фæсивæды профессион зонындзинæдтæ цæмæй фылдæр кæной, уымæн ног фадæттæ аразæм. Сымах стут цæгатирыстойнаг университеты æндидзæг студентон къордты змæлды ногдзаутæ. Рæхджы уæ дæсныйадмæ гæсгæ кусын кæй райдайдзыстут, уый фæрцы уæм ног профессион зонындзинæдтæ фæзындзысты, стæй уæ курдиæттæ раргом кæндзыстут. Нæ университеты рагæйдæр чи уыд, нæ хæс у студентон къордты уыцы арфæйаг æгъдæуттæ бахъахъхъæнын, стæй студентон змæлды педагогон, арæзтадон æмæ æндæр къабæзты дарддæры рæзтæн ахъаз кæнын. Студентон къордты æндидзынадмæ æвæрæнтæ бахæссæг æппæт адæмæн – бузныг, – загъта Огъуаты Алан.
Университеты спортивон-дзæбæхгæнæн комплекс «Дельфин»-ы директор Дзобелаты Олик раздæры студентон къордты рæсугъд æгъдæутты тыххæй хабæрттæ радзырдта. Фæстæдæр Дзобелаты Олик æмæ Огъуайы-фырт студенттæн радтой профессион ахуырад фæуыны тыххæй æвдисæндартæ.
«Уæрæсейаг студентон къордты»-йы штаб ЦИПУ-йы Карьерæйы центры бындурыл кæй кусдзæн, уый фæрцы уыдзæн æппæт бæстæйы экономикæйы алыхуызон къабæзты куыстæн студентты иудадзыг цæттæ кæныны фадат.
Нæ университет фæсивæды æппæтуæрæсеон æхсæнадон организаци «Уæрæсейаг студентон къордты»-йы грантон конкурсы кæй фæуæлахиз, уый фæрцы уыд проект баххæст кæныны фадат. ЦИПУ райста 198 мин сомы бæрц грант æмæ афтæмæй студенттæн лæвар цæттæгæнæн курсытæ арæзт æрцыдысты.
Профессион цæттæкæнынады программæ æнтыстджынæй чи рахатыд, проекты архайдтой университеты цалдæр факультетæй 23 ахæм студенты. Рæхджы ацы адæм нæ бæстæйы алыхуызон регионты сывæллæтты дзæбæхгæнæн лагерты кусын райдайдзысты педагогтæй.
Фæстæдæр университет студентон къордты штабы архайд фæуæрæх кæндзæн. Педагогон дæсныйадæй фæстæмæ студентты цæттæ кæндзысты лæггадкæнынады, арæзтады, инженерийы, медицинæ æмæ æндæр хъæугæ къабæзты куыстæн.
Цæгат Ирыстоны паддзахадон университеты пресс-службæ
