Радон æрвылкъуырион, аппаратон æмбырд амыдта РЦИ-Аланийы Сæргълæууæг Сергей Меняйло. Æмбырды архайджытæ ныхас кодтой нæ республикæйы социалон æмæ экономикон фарстатыл.
Куыд алы хатт, афтæ та ныр дæр æмбырд райдыдта Цæгат Ирыстоны оперативон уавæрæй. Нæ республикæйы граждайнаг хъахъхъæнынад æмæ æнæнхъæлæджы уавæрты хъуыддæгты фæдыл комитеты сæрдар Александр Хоружий бæстон доклад скодта, ивгъуыд къуырийы дæргъы нæм цы цаутæ æрцыдис, уыдоны тыххæй. Куыд загъта, уымæ гæсгæ дарддæр дæр нæ республикæйы фæзуат тыхджын тæрккъæвдаты бонтæ нырма уыдзæн æмæ æмбæлгæ ведомствæты службæтæ æнæнхъæлæ-джы уавæртæм сты цæттæ. Александр Хоружий марадзырдта, фæстаг уарынтæ та нæ республикæйæн знаггад кæй æрхастой, уый тыххæй.
– Мæздæджы районы станицæтæ Притеречная æмæ Черноярскаяйы тæрккъæвдаты аххосæй бирæфатерон хæдзары сæр дымгæ ахаста, афæлдæхт 30 бæласы. Уыдонæй цалдæр бахъыгдардтой, æрдзон газ кæуылты цæуы, уыцы егъау хæтæл. Уымæй уæлдай, æрдзон фыдбылызы фæстиуджыты аххосæй ныллæууыд энерготыхдæттæн линитæ, газ æмæ доны куыст. Фæлæ æппæт хъуыддæгтæ дæр банывыл кодтой. Къуыримæ нæ республикæйы æрцыд 141 фыдракæнды, уыдонæй 65 нæма раргом кодтой. Æртæ та уыдис хи амарыны цаутæ. Се ‘ппæты фæдыл дæр цæуы слестгæнæн куыст, – загъта Александр Хоружий.
Къуырийы куыстæн доклад скодта РЦИ-Аланийы цæрæнуатон-коммуналон хæдзарад, артаг æмæ энергетикæйы министр Хъараты Тимур. Уый ра-дзырдта, тæрккъæвдаты
фæстиуджытæ аиуварс кæныныл ведомствæйы службæтæ куыд архайынц, стæй нæ республикæйы кæй сарæх сты, газ, энерги æмæ доны коммуникацитæ æнæ закъонæй сæ хæдзæрттæм чи бафтыдта, уыцы цаутæ. Сергей Меняйло министрæн бафæдзæхста ахæм цаутæн кæрон скæнын.
– Уæ куыст афтæ саразут, æмæ адæм æнæзакъон митæ мауал кæной. Уый тыххæй хъæуы та биноныг архайд æмæ цæстдард. Нæй уæм куысты пълан, æмæ уæд ахæм цаутæн дæр æнæрцæугæ нæ вæййы, –бафиппайдта республикæйы разамонæг. Сергей Меняйло цæрæнуатон-коммуналон хæдзарад æмæ арæзтады министрадтæн бахæс кодта аразæг-подрядон компанитимæ бадзырдтæ кæнын æмæ семæ ног объектты фæзты «ливневкæтæ» аразыны тыххæй проекттæ цæттæ кæныны хъуыддаджы архайын.
Аппаратон æмбырды ныхас цыдис ахуырадон къабазы фарстатыл дæр. РЦИ-Аланийы ахуырад æмæ наукæйы министр Алыбегты Эллæ доклад бацæттæ кодта нæ республикæйы ахуырадон фарстаты фæдыл. Куыд радзырдта, афтæмæй Иумæйаг фæлварæны фыццаг къæпхæн ахицæн, æмæ рауагъдонтæ æнтыстджын, хорз бæрæггæнæнтæ равдыстой. Министр фæнысан кодта, ацы аз уæлдæр ахуыргæнæндæттæм ис 4 мин бюджетон бынаты. Уыдонæй, фыццаджыдæр, ахуырмæ ист цæудзысты сæрмагонд æфсæддон операцийы архайджыты сывæллæттæ. 27 июны, астæуккаг скъола каст фæуæг æрыгон лæппутæ æмæ чызджытæн кадджын уавæры лæвæрд цæудзысты аттестаттæ, 2 июлы та сыгъзæрин майдантыл чи фæци каст, уыцы рауагъдонтæн. Дарддæр цæудзæн скъолатæ æмæ рæвдауæндæтты бындурон цалцæг дæр. Сергей Меняйло Ахуырады министрæн бахæс кодта, ног ахуыры азмæ скъолатæ иттæг хорз сифтонг кæнын.
– Ирон æвзаджы рæзтæн агурын хъæуы æппæт мадзæлттæ дæр, цæмæй не ‘взаг сæфт ма ‘рцæуа. УФ-йы Президент Указ бафыста, нæ бæстæйы цы алыхуызон æвзæгтæ ис, уыдон бахъахъхъæнын æмæ сæ рæзты фæдыл закъон. Скъолатæ æмæ рæвдауæндæтты алы ран дæр ирон æвзаджы ахуыры программæмæ бахæссын, ныры онг дзы нæ фысджытæй чи нæ уыд, уыдоны уацмыстæ дæр. Ног ахуыры аз бæлвырд æмæ биноныг æргом аздахын хъæуы математикæмæ. 1-4 кълæсты æппæт скъолаты дæр ацы предметы ахуыртæ ноджы тынгдæр райрæзын кæнын. Дзæу-джыхъæуы ахуырадон центр «Вершина» æмæ Физикон-математикон скъолайы
ахуыргæнджыты æргом раздахут ацы фарстамæ, уымæн æмæ нæ республикæйы математикæ æмæ иннæ бæлвырд наукæтæм курдиатджын сывæллæттæ бирæ ис, æмæ сын аразын хъæуы æппæт фадæттæ дæр сæ рæзтæн, – загъта Сергей Меняйло.
Æмбырды ма ныхас цыдис, Цæгат Ирыстоны сæрмагонд закъон «Социальный кодекс», зæгъгæ, саразыныл дæр. Нæ республикæйы Сæргълæууæг куыд радзырдта, афтæмæй æппæт социалон-материалон æххуыстæ дæр ветерантæ, сæрмагонд æфсæддон операцийы архайджытæ, æвæрæз бинонтæ æмæ инвалидтæн кæнынц алы ведомствæтæ æмæ хица-уиуæггæнæг оргæнтæ. Æххуыс кæй бахъæуы, уыдон агурын райдайынц, кæцы ведомствæмæ хауынц, уый æмæ, цæмæй афтæ мауал уа, алы рæтты ма агурой социалон æххуыстæ, уый тыххæй иу закъон бацæттæ кæндзыстæм, æппæт социалон æххуыстæ дæр кæдæм цæудзысты, ахæм иумæйаг «Социалон кодекс»-ы къабаз.
Аппаратон æмбырды ма нæ республикæйы Сæргълæууæг фæбæрæг кодта, хъæууон хæдзарады кусджытæ зæххы хъалон куыд фидынц, республикæйы бюджетмæ цы процент хæссынц, сæ продукци кæдæм æрвыст цæуы, уыцы фарста сбæлвырд кæнын. Æмбырды ныхас цыд, паддзахадон æвзæрстытæ куыд ацæудзысты, ууыл дæр.
Саутæты Тамилæ
