Дзæуджыхъæуы бынæттон хиуынаффæйады администрацийы сæргълæууæг Милдзыхты Вячеслав хаст æрцыд Æппæтдунеон конгрессы Совет «Объединенные города и местные власти-Евразии»-йы хыгъдмæ.
Ацы бонты Мароккойы Танжермæ конгрессы архайынмæ æрбацыдысты: Европæ, Африкæ, Цæгат æмæ Хуссар Америкæ, Хæстæгдæр Скæсæн, Сабыр фурды Азиатон регионтæ æмæ Евразийы муниципалитетты сæргълæуджытæ æмæ мэртæ. Уæрæсейаг минæварады сæргъы ис УФ-йы Президенты мидполитикæйы Управленийы хицауы хæдивæг Евгений Грачев. Уым ис нæ бæстæйы 54 горæтæй минæвæрттæ, се ‘хсæн – Дзæуджыхъæуы мэр Милдзыхты Вячеслав æмæ йæ хæдивæг Цæболты Отар дæр. Æмбырдаразджытæ цы сæйраг фарстатæ сбæлвырд кодтой, уыдон баст сты фæзуæтты рæзт æмæ адæмы хæрзхъæд царды уавæртимæ. Конгрессы архайджытæ алы фæзты ныхас кæнынц дунеон фæткы бынæттон хиуынаффæйады социалон, экономикон æмæ экологон рæзты, нырыккон æмæ фидæны урбанистикæйы фарстатыл. Горæтаг практикæты æнтыстдзинæдтæ чи исы, уыдон та иннæтæн сæ фæлтæрддзинадæй хай кæнынц.
Егъау æмбырды архайджытæ равзæрстой евразийаг хайады Советы уæнгты дæр. Уыцы бæрæггæнæнтæм гæсгæ Милдзыхты Вячеслав æвзæрст æрцыд Советмæ.
– Æппæтадæмон организацийы архайыны мадзал ахъаз у Дзæуджыхъæумæ фæсарæйнаг партнерты цымыдисдзинад æмæ æргом æрбаздахын, уый та у фидæны нæ фæзуæтты рæзт æмæ дунейы хуыздæр горæтаг практикæтæ æмæ муниципалитетты скондты хъæздыг фæлтæрддзинадæй пайда кæныны фæрæз. Амынд егъау организацийы куысты архайынц дунейы бæстæтæй 240 мин горæты, чысыл муниципалитеттæй райдай æмæ стыр горæттæй фæу. Уый Ирыстонæн хуымæтæджы разамынды фæлтæрддзинад нæу, фæлæ нæ республикæйы сæйраг сахары амонд дунеон процессты рæзты фенын, – загъта Милдзыхты Вячеслав.
Уæлдæр амынд Советы евразийаг хайадмæ хаст æрцыдысты 850 горæты æмæ регионы, Уæрæсе, Азербайджан, Белорусси, Казахстан, Киргизи, Таджикистан, Туркменистан, Узбекистан æмæ Монголийы ассоциацитæй.
Дзæуджыхъæуы бынæттон хиуынаффæйады
администрацийы пресс-службæ
