Æнæниздзинад хъахъхъæнынады фарстатæм – лæмбынæг цæстдард
РЦИ-Аланийы Сæргълæууæг Сергей Меняйло æмæ Уæрæсейы Федерацийы æнæниздзинад хъахъхъæнынады министр Михаил Мурашко сæ кусæг фембæлды æрдзырдтой Цæгат Ирыстоны цæрджытæн медицинон æххуыс хъомысджындæрæй дæттыны фарстатыл.
Регионы Сæргълæууæгимæ фембæлыны разæй Михаил Мурашко бабæрæг кодта къорд медицинон куыстуаты, се ‘хсæн – Цæгат Кавказы бирæкъабазджын федералон центр Беслæны, бындурон цалцæджы фæстæ февралы чи байгом, Дзæуджыхъæуы уыцы цыппæрæм поликлиникæйы фыццаг дæлхайад, стæй Республикон клиникон рынчындон – ам сбæлвырд кодта Дадзинты центр æмæ æртыккаг æмвæзады арæндоны куыст.
Уыцы бон Хицауады хæдзары æнæниздзинад хъахъхъæнынады актуалон фарстаты фæдыл арæзт æрцыд кусæг æмбырд Сергей Меняйло æмæ Михаил Мурашкойы разамындæй. Архайдтой дзы Æнæниздзинады къабазмæ цæстдарæг федералон службæйы разамонæг Алла Самойлова, Æнæмæнг медицинон фæдзæхстады федералон фонды сæрдар Илья Баланин, Уæрæсейы Æнæниздзинад хъахъхъæнынады министрады федералон уагдæтты дæлхайæдты минæвæрттæ Цæгат Ирыстоны.
Æмбырд байгомгæнгæйæ, Сергей Меняйло Михаил Мурашкойæн арфæ ракодта, федералон ведомствæ регионæн иудадзыг кæй æххуыс кæны, уый тыххæй, æмæ загъта, иумæйаг хъарутæй республикæйы æнæниздзинад хъахъхъæнынады системæ ноджы кæй фæхуыздæр уыдзæн æмæ республикæйы алы цæрæгмæ дæр кæй хæццæ кæндзæн.
– Фæстаг азты нæ къухы бафтыд медицинон кусæндæтты материалон-техникон базæ фæфидардæр кæнын национ проекттæ æмæ федералон программæтæ æххæст кæныны руаджы. Мах нырыккон кусæнгæрзтæй хъазуатонæй ифтонг кæнæм поликлиникæтæ, амбулаторитæ æмæ фелсырон-акушерон пункттæ, уыимæ, стыр æргом здахæм райдиан цæджы райрæзтмæ, уымæн æмæ республикæйы алы цæрæджы æнæниздзинадыл фыццаг рады уыдон дзуапп дæттынц. Уæрæсейы Федерацийы Президент æмæ дæу æххуысы фæрцы мах абон райдыдтам аразын Республикон пульмонологон центр. Хъавæм ногæй бындуронæй рацаразын æмæ саразын онкологион диспансер æмæ Мæздæджы арæндон, – загъта Сергей Меняйло.
Цæгат Ирыстоны разамонæг ма фæбæрæг кодта, дарддæр дæр куыст кæй цæуы республикæйы дзæбæхгæнæн уагдæттæ нырыккон медицинон техникæйæ сифтонг кæныныл, медикты фæлтæрддзинад фæбæрзонддæр кæныныл, адæмæн ног хъæугæ
объекттæ аразыныл.
Михаил Мурашко фæбæрæг кодта, абон æнæниз-дзинад хъахъхъæнынады системæйы ивддзинæдтæ баст кæй сты, куыд хъæугæ финансон фæрæзтимæ, афтæ æндæр хъуыддæгтимæ дæр, райдай раст диагностикæйæ, рынчынмæ лæмбынæг цæстдард æмæ йын бæрзонд технологион æххуыс раттынæй фæу.
– Медицинæйы райдиан цæджы модернизацийы проект æххæстгонд цæуы Уæрæсейы Федерацийы Президент Владимир Путины фæдзæхстмæ гæсгæ, æмæ ивгъуыд азты регионы йе ‘ппæт къæпхæнтæ дæр се ‘мгъуыдтæм конд æрцыдысты. Ацы аз регион онкологион центрæн райсдзæн ифтонггæрзтæ радиофармацевтикон препараты æххуысæй иртасæнтæ аразынæн. Нæ абоны кусæг балцы фæлгæты мах федтам фæзуат тагъд æххуыс исæн модулон хайады арæзтад. Уый у уæлрадон пациентты нырыккон хайад. Национ проект «Бинонтæ»-йы фæлгæты ныртæккæ регионмæ ифтонггæрзтæ ‘рбацыд 180 милуан сомæй фылдæры аргъ. Уыцы ифтонггæрзты руаджы дзæвгар фæбæрзонддæр ноггуырдтæн реанимацион æххуыс раттыны æмвæзад. Фыцца-джыдæр, ам фæзынд сæ улæфт фæхуыздæр кæныны мадзæлттæ. Сæйрагдæр та фæхъомысджындæр акушерон æххуыс, мад æмæ сывæллонмæ цæстдард ног технологиты фæрцы. Куыд бафиппайдтон, афтæмæй персонал уыцы ‘гъдауæй æнтыстджынæй архайы, – бахахх кодта Михаил Мурашко.
Фембæлды архайджытæ ма ‘рныхас кодтой, Цæгат Ирыстоны æнæниздзинад хъахъхъæнынады рæзты национ нысантæ æмæ æнæмæнг медицинон фæдзæхстады территориалон программæ куыд æххæстгонд цæуынц, уыцы фарстатыл.
РЦИ-Аланийы æнæниз-дзинад хъахъхъæнынады министр Митциты Астан радзырдта республикæйы мæлынад фæкъаддæр кæныны мадзæлттыл. Куыд загъта, афтæмæй абон регионалон Хицауады æмвæзадыл куыст цæуы, цæмæй бынæттон хиуынаффæйады администрацитæ адæмы разæнгард кæной профилактикон мадзæлтты архайынмæ.
2027 азы федералон проект «Уæлрадон медицинон æххуыс фæхуыздæр кæнын»-ы фæлгæты Республикон клиникон рынчындоны бындурыл арæзт æрцæудзæн къорд мадзалы. Проектмæ гæсгæ исæн уаты инфраструктурæ æппæтæй дæр ивд æрцæудзæн, уыдзæн дзы нырыккон диагностикæгæнæн ифтонггæрзтæ, æмæ уый фæстиуæгæн рынчынæн тагъд медицинон æххуыс раттыны маршрут дзæвгар фæцыбырдæр уыдзæн, йæ хæрзхъæддзинад та – бæрзонддæр.
РЦИ-Аланийы Сæргълæууæг æмæ Хицауады пресс-службæ
