Дзæуджыхъæуы историйы музейы Архитектурæ æмæ дизайны академи сарæзта Хæххон-металлургон институты студентты куыстыты равдыст. Ахуыры рæстæг 2-æм курсы студенттæ – фидæны архитектортæ æмæ графикон дизайнертæ ныв кодтой дунейыл хъуыстгонд нывгæнджыты куыстытæ. Къопитæ кæнгæйæ, уыдон ахуыр кодтой нывкæнынады сусæгдзинæдтæ æргом кæныныл.
Равдыст гом кæныны мадзалы архайдта Ирыстоны сæйраг архитектор Æлбегаты Руслан. Алыхуызон мастерты стильтæ ахуыр кæнгæйæ студенттæ базыдтой, æппæт дунейы дæр зындгонд нывгæнджытæ Амадео Мадильяни, Альфонс Муха, Поль Гоген, Пабло Пикассо, Аристарх Лентулов, стæй япойнаг гравюрæтæ æмæ индиаг миниатюрæты хицæндзинæдтæ иртасын. Сæ алкæй сфæлдыстады дæр ис, иу нывгæнæджы иннæтæй чи хицæн кæны, ахæм фæзилæнтæ. Уыдон рахатын, хи уддзæф сæм бахæссын сæ куыстыты къопитæ кæнгæйæ – уыцы хæсыл зæрдиагæй бакуыстой студенттæ. Сæ куыстытæ зæрдæмæдзæугæ рауадысты, уый бафиппайдтой равдысты архайджытæ.
Диссаг та уый у, четæн æмæ сæ зети ахорæнтæй кæй нæ кодтой, фæлæ ахуыры райдиан проекттæ ныв кæнгæйæ, цы аивадон æрмæджытæй фæпайда кæнынц, уыдонæй – гуашь æмæ гæххæттæй. Уый сын сæ куыст фæзындæр кодта, фæлæ кæронбæттæны сæ конд ныв – къопитæй зын уыд цæстæнгас атонæн, афтæ хорз рауадысты. Уый, зæгъгæ, нæ уыд, уæд дзы ахæм равдыст дæр нæ рауадаид.
Хуыбиаты Ларисæ
