Наукон библиотекæйы ацы бонты фенæн ис æрыгон, фæлæ курдиатджын нывгæнджытæ Джиоты Вадим æмæ Бититы Зæлинæйы куыстыты иумæйаг равдыст.
Æдæппæтæй 48 нывы кæм ис, уыцы проект схуыдтой «Родные мотивы».
Цæгат Ирытоны паддзахадон университеты аивæдты факультеты рауагъдонтæ-нывгæнджытæн сæ бирæ азты фыдæбæттæн ныр аргъ кæнынц равдыстмæ ‘рбацæуджытæ.
«Джиоты Вадим уыд зындгонд нывгæнæг, аивæдты факультеты бындурæвæрæг, Уæрæсейы аивæдты академийы академик Бедойты Шалвайы курсы ахуырдзау. Профессор уайтагъд банкъардта лæппуйы курдиат, пейзажтæ фыссынмæ уæлдай хорз арæхст, йæхи фæлтæрддзинадæй цæстуарзонæй фæхайджын кодта æрыгон нывгæнæджы. Вадимы пейзажтæ сты рог дымгæйау, уæлдæфон, раст сæм цыма ныр бахизæн, бавналæн ис. Сты хуымæтæг, фæлæ вазыгджын. Йæ алы нывы дæр раст цыма уд бауадзы, афтæ. Æнæдызæрдыгæй зæгъдзынæн, равдысты аивадуарзджытæ кæй базонгæ уыдзысты æрыгон курдиатджын нывгæнæгимæ», – загъта аивадиртасæг Гæздæнты Зарæ.
Бититы Зæлинæйы нывтæ та нæ хонынц нывгæнæджы сабибонты æхсызгон мысинæгтæм, йæ уарзон æмæ зæрдæйæн зынаргъ бынæттæм. Зæлинæ ныридæгæн у зындгонд нывгæнæг. Йæ куыстытæй алкæцыдæр æххæст у райгуырæн бæстæмæ уарзондзинад æмæ хъарм ахастдзинæдтæй.
«Зæлинæ равдыстмæ бацæттæ кодта 25 пейзажы. Фыццаджыдæр, сты тынг арæхстджын æмæ курдиатджын фыст, бавæрдта дзы бирæ æнкъарæнтæ, уæздандзинад. Уый бамбарæн ис, хуымæтæг гыццыл пейзажмæ кæсгæйæ, адæймаг арф хъуыдыты аныгъуылы, цæстытыл ауайынц йæхи сабибонтæ. Æмæ уыцы æнкъарæнтæн аргъ дæр нæй», – бафтыдта Гæздæнты Зарæ.
Равдыст йæ куыст адарддæр кæндзæн 28 июлмæ. Бацæуæн ис алкæмæн дæр лæвар.
Гугкаты Жаннæ
