Æрæджы Мæздæджы районы 7-æм астæуккаг ахуырадон скъолайы кадджын уавæры байгом кодтой Уæрæсейы Хъæбатыр Карен Шишкины цыртдзæвæн. Уый фæмард хæрзæрыгонæй, 19-аздзыдæй.
Карен Владимиры фырт Шишкин райгуырд Цæгат Ирыстоны Автономон советон республикæйы Мæздæджы 1975 азы 14 июлы. Каст фæцис 7-æм астæуккаг ахуырадон скъола.
1993 азы йæм фæсидтысты æфсады рæнхъытæм. Йе ‘фсæддон хæс æххæст кодта Цæгат Кавказы æфсæддон зылды 693-æм гвардион мотоæхсæн полчъы. Уый æрбынæттон Зæрæмæджы. (1994 азы 1 февралы полкъ рацарæзтой, æмæ сси Хуссар æфсæддон зылды 4-æм гвардион хæстон базæ).
Архайдта фыццаг цæцæйнаг хæсты 1994 азы, Цæцæны Республикæйы зæххыл цы хæст цыд, уым. Равдыста хъæбатырдзинад æмæ æхсар, Грозна бацахсыныл горæты уынгты цы карз тох цыд, уым. 1 январы тохы йæ танк æххуыс кодта мотоæхсæн хайæдтæн. Знæгтæ йын йæ танк фехстой, æмæ Карен уæззау цæф фæцис. Фæлæ афтæмæй дæр йæ ныфс нæ асаст, нæ ныууагъта йæ тох хъæбатыр лæппу. Хъуыды кодта йе ’мбæлттыл. Бантыст ма йын йæ саст машинæ фæндагæй иуварс атæрын, цæмæй иннæ хæстон машинæтæн размæ абырсыны фадат фæуа. Йæ танк пиллон арт калдта. Карен уæззау цæфæй судзгæ танкæй куыд рацæйхызт, афтæ йыл знаджы снайперы нæмыг сæмбæлд. Аскъуыд йæ цард æрыгон лæппуйæн. Ныгæд æрцыд йæ райгуырæн горæт Мæздæджы.
Сæрмагонд хæс æххæстгæнгæйæ, цы хъæбатырдзинад равдыста, уый тыххæй Уæрæсейы Федерацийы Президенты Бардзырдæй 1995 азы 15 майы Карен Владимиры фырт Шишкинæн лæвæрд æрцыд Уæрæсейы Федерацийы Хъæбатыры ном (йæ амæлæты фæстæ).
Мадзал бацæттæ кодтой, Фыдыбæстæ хъахъхъæнгæйæ чи фæмард, уыдоны бинонты Æппæтуæрæсеон æхсæнадон организацийы цæгат-ирыстойнаг хайад æмæ Хæстон æфсымæрад. Цыртдзæвæн байгом кæныны мадзалы архайдта Хъæбатыры кæстæр æфсымæр Армен, хæстон змæлдтыты ветерантæ, горæты администрацийы минæвæрттæ æмæ 4-æм æфсæддон базæйы æфсæддонтæ.
Карен цы скъолайы ахуыр кодта, уыцы скъолайы ахуырдзаутæ йын æдзух дæр базилынц йæ ингæнмæ. Фенæн дзы вæййы ног тынд дидинджыты баст дæр. Хъæбатыртæн мæлæт нæй. Карен Шишкины рухс ном æнустæм цæрдзæн йæ хиуæтты, чи йæ зыдта, уыдоны, æмæ йæ хæстон æмбæлтты зæрдæты.
ХЪОЙБАЙТЫ Галинæ,
къам систа Татьяна Шеходанова
