Сой, сой, сой
Уæ каркыл, дам, бос уа
Сой цæуы, сой.
Уæ бонтæ та хорз уа
Сой цæуы, сой.
Сойгæнджытæ фæцæуынц.
Сой цæуы, сой.
Амонд семæ фæхæссынц.
Сой цæуы, сой.
Уæлæ къулыл дидитæ.
Рахæссут нын чъиритæ.
Алы аз дæр ардæм.
Уæлæ цары нæл гæды.
Сойгæнджытæн бæгæны.
Уæлæ хохы мæкъуылтæ.
Кусартæй та æсгуытæ.
Дæлæ быдыры тæбинаг.
Ноггуырд та уæд цæринаг.
Сау галы сыкъа зæбул куыд уа.
Инназ дæр та лæппу куыд уа.
Станцæ у вагонджын.
Ноггуырд та уæд пъагонджын.
Дæлæ кæрты гæнгæлы
Ме ’мбал сыдæй фæмæлы.
Уæлæ цары хъæдуры хъилтæ.
Цæй ма æфсин цы ныхъил дæ.
Къодахы бын лыстытæ.
Æфсины сæры сыстытæ.
Дуармæ хъæдтæ.
Сойгæнджытæ лæгтæ.
Дæлæ куыройы æрмгуырой.
Æфсинтæ та рæвдз куыд уой.
Нартхоры куырис баст.
Уæ кувинæгтæ барст.
Торчынтæм Бабу.
Хуыцауæн табу.
Къардоны хъазахъ.
Сойгæнджытæн арахъхъ.
Мæздæджы, дам, кæф уæййаг.
Сойгæнджытæн хæдойнаг.
Адæм фæдисмæ
Сойгæнджытæ къæбицмæ.
Сой, сой, сой.
