Тугъанты Махарбеджы номыл музейы Культурон центры байгом равдыст «Сезон охоты на плюшевых мишек». Проекты æвдыст цæуынц, Саулаты Сергей сæрмагондæй ацы равдыстмæ цы ног уацмыстæ ныффыста, уыдон.
Саулаты Сергейы ном Ирыстоны сфæлдыстад уарзджытæн хорз зонгæ у. Абон нымад у йæ рæстæджы цымыдисагдæр нывгæнджытæй иуыл. Йæ куыстыты равдыст ацыд ивгъуыд 2025 азы уалдзæджы. Автор кæд æнæнцойæ архайы æмæ æдзухдæр йæ куыстытæ адæмы рæгъмæ рахæссы, уæддæр йæ равдыст «Чистый импульс» уыд æнæнхъæлæджы цау. Уый ног хуызы равдыста нывгæнæджы бирæвæрсыг курдиат. Аивадуарзджытæ йыл афтæ æхсызгонæй кæй сæмбæлдысты, уый йæ сразæнгард кодта ног равдыст бацæттæ кæнынмæ. Йæ сисбынæй цы нывтæ фæзындис, уыдон сты рог, фæлæ уыцы иу рæстæг адæймаджы зæрдæйы равзæрын кæнынц цавæрдæр арф æнкъарæнтæ, лирикон æмæ экспрессивон, зыны дзы авторы ирони дæр.
Ног равдыстæн ном ратта йæ куыстытæй иуы номмæ гæсгæ – «Сезон охоты на плюшевых мишек». Музыканты сæры алыхуызон мелодитæ куыд сæвзæры, афтæ нывгæнæджы хъуыдыты дæр цардимæ баст сюжеттæ равзæрынц. Саулаты Сергейы нывты сюжеттæ райгуырынц æнæнхъæлæджы. Уый у йе сфæлдыстады хицæн хуыз. Сергейы нывтæм кæсгæйæ, адæймагмæ сæвзæры ахæм хъуыды, цыма йæ хъайтартæ сты цавæрдæр литературон уацмысты архайджытæ. Фæлæ уый у авторы дæсныдзинады æвдисæн.
Сергей цы нывтæ саразы, уыдон сты алыхуызон сæ техникæ æмæ стильтæм гæсгæ. Хъæздыг ахорæнтæй пайда кæнгæйæ, дæсны нывгæнæг æвдисы царды æцæгдзинад. Йæ акварелон куыстыты, «Привезли свежее пиво», «Мясник», «Большой улов» æмæ иннæты автор ахæм бæлвырд фæзилæнтæ равдыста, æрвылбоны царды адæймаг хъуыды дæр кæуыл нæ акæны, нæ цæст æппæт лыстæг хъуыддæгтыл не ’рхæцы. Бæлвырд у, нывгæнæгæн йæ цæстытыл йæ сабибонтæ кæй ауайынц, уый.
– Мæн ахæм дуне фæнды равдисын, мæхи цæрын кæм бафæнда, – зæгъы нывгæнæг.
Саулаты Сергей у Уæрæсейы нывгæнджыты цæдисы уæнг. Йе сфæлдыстадон бынтæй бирæтæ фенæн ис аивадон равдыстыты, музейты, хицæн адæймæгтæй Уæрæсейы æмæ фæсарæнты.
Проекты архайынц 60 нывæй фылдæр нывкæнынад æмæ графикæйæ. Уый фæлгæты арæзт цæуынц литературон ахуыртæ сывæллæттæ æмæ фæсивæдæн.
ХЪОЙБАЙТЫ Галинæ,
къам систа Татьяна Шеходанова
