РЦИ-Аланийы Сæргълæууæг Сергей Меняйло фемæлд Хуссар Ирыстоны Президенты хæстæ æххæстгæнæг Хъамболты Маратимæ. Ныхæс цыди дыууæ республикæйы абоны æмгуыстады ахъаззаг фарстатыл.
Сергей Меняйло бахахх кодта, Хуссар Ирыстонимæ бастдзинæдтæ парахат кæныныл иудадзыг куыст кæй цæуы. Куыд загъта, афтæмæй сæрмагонд æргом здахын хъæуы, дыууæ республикæйы цæрджыты царды уавæртыл хорзырдæм чи фæзындзæн, уыцы къабæзтæм.
– Абон нын цы бастдзинæдтæ ис, сæйрагдæр уыдон бахъахъхъæнын нæу, фæлæ – цæмæй практикон æгъдауæй фæахадгæдæр уой. Цæгат æмæ Хуссар Ирыстонæн ис иумæйаг æвзаг æмæ культурæйы тыгъдад, уымæй сæйрагдæр та – адæмы ‘хсæн æнгом бастдзинæдтæ. Хъуамæ лæмбынæг æркæсæм абоны æмгуыстады фæстиуджытæм, раиртасæм, сног кæнын дзы кæцытæ хъæуы, æмæ фидæны æмгуыстады сæйрагдæр къабæзтæ сбæлвырд кæнæм. Раздæр нæ регионты ‘хсæн цы бадзырдтæ уыд, уыдон адарддæр кæнын хъæуы бæлвырд уынаффæтæ æмæ проекттæ дыууæ республикæйы цæрджыты пайдайæн. Мах цæттæ стæм хъæугæ æххуыс раттынмæ æмæ Хуссар Ирыстоны специалисттимæ æмгуыстад фидар кæнынмæ, – загъта Сергей Меняйло.
Фембæлды рæстæг дыууæ разамонæджы сæйраг æргом аздæхтой социалон-экономикон æмæ гуманитарон къабазы æмгуыстады фарстатæм. Сæ сæйрагдæртæ – ахуырад, наукæ, культурæ æмæ аивады, стæй фæсивæды патриотон хъомыдады æмархайд.
Хъамболты Марат дæр фæбæрæг кодта, Цæгат æмæ Хуссар Ирыстоны æнгом бастдзинæдтæ сты фидар бындур дарддæры хъомысджын æмгуыстадæн.
– Цæгат æмæ Хуссар Ирыстоны бæттынц иумæйаг истори, хæстæгдзинад æмæ иумæйаг интерестæ. Хуссар Ирыстоны бирæ граждæнтæ цæрынц, кусынц æмæ ахуыр кæнынц Цæгат Ирыстоны, бинонты дыууæ республикæйы ‘хсæн арæх бахъæуы цæуын. Уымæ гæсгæ ахсджиаг хъуыддаг у дарддæры æмгуыстадæн уавæртæ саразын – экономикæ, ахуырад, æнæниздзинад хъахъхъæнынад, туризм æмæ иннæ къабæзты. Иумæйаг проекттæ æххæст кæнынæн ис бирæ гæнæнтæ, æмæ дзы спайда кæнын хъæуы, фыццаджыдæр, цæрджыты фæрныгадæн, – загъта Хуссар Ирыстоны Президенты хæстæ æххæстгæнæг.
РЦИ-Аланийы Сæргълæууæг æмæ Хицауады пресс-службæ
