Æппæтуæрæсеон «Физкультурникы бон» хъæздыг бæрæгбонау рауад Ирыстоны алыхуызон ерыстæ æмæ хиирхæфсæн мадзæлттæй.
Дзæуджыхъæуы Доны станцæйы цы къорд спортивон фæзтæ арæзт æрцыд, уыдоны 9 августы мин адæймагæй фылдæр сæ гæнæнтæ ‘вдыстой спорты алы хуызты.
Бæрæгбон байгом кæныны мадзалы спортуарзджытæн зæрдиаг арфæтæ ракодтой РЦИ-Аланийы физикон культурæ æмæ спорты министры хæдивæг Хуадонты Артур, Дзæуджыхъæуы администрацийы фæсивæдон политикæ, физикон культурæ æмæ спорты комитеты сæрдар Айларты Зауыр, спорты сгуыхт мастер Тменаты Тамерлан.
Доны бассейн æмæ, йæ алыварс цы спортивон фæзтæ ис, уым райсомæй фæссихормæ хъæлдзæг уавæры цыдысты ерыстæ: волейбол, баскетбол, мас-рестлинг, стъолыл хъазгæ теннис, уæзæгтæ исын, армрестлинг, згъорын, шахмæттæй хъазын, топп æмæ фатæй æхсынæй.
Афтæ зæгъæн ис, æмæ ахæм бæрæгбоны ерысты архайыны фембылд уæвджытæ нæ вæййы. Афтæ рауад ацы хатт дæр. Бæрæгбоны архайджытæй иутæ уыдысты 58-æм Æфсады службæгæнджытæ. Уыдонæй иутæ уыдысты ‘фсæддон оркестры музыканттæ, æмæ сæ куы бафарстам: «Спортимæ лымæн цæй тыххæй стут?» зæгъгæ, уæд нын загътой «Æфсады уæвгæйæ, хъуамæ оркестры музыканттæ дæр сæхи хатой, куыд æфсæддонтæ. Цы нæ ракъахдзæф, цы нæ фугæнгæ оркестры зæлланг хъæлæсæн хъæуы хорз физикон цæттæдзинад, æмæ уымæн стыр æххуыс у физикон æгъдауæй хорз цæттæ уæвын. Уымæ гæсгæ уарзын хъæуы спорт. Æнæзивæг куы уай, уæд куысты домæнтæ дæр æххæст кæнын æнцондæр вæййы».
Æмæ, æцæгæйдæр, оркестры музыканттæ сæ хъару æмæ цæттæдзинад æвдыстой спорты цалдæр хуызæй.
Физкультурникы бон Дзæуджыхъæуы сæрмæ Доны станцæйы рауад зæрдæмæдзæугæ. Æхсызгон уыди фенын алы кары уæвæг спортуарзджыты архайд спорты къорд хуызы. Уыдон арфæ кодтой бæрæгбон саразджытæ РЦИ-Аланийы физикон культурæ æмæ спорты министрад, Дзæуджыхъæуы бынæттон администраци, 58-æм Æфсады командæгæнджытæн.
Бæрæгбоны кæронбæттæны ма æхсызгон уыди фехъусын, Дзабиты Рустам разамынд кæмæн дæтты, уыцы æвзонг доулистты оркестры цагъд.
Баскаты Уырызмæг
