Программæ «Хъæууон дохтыр» («Земский доктор») у, медицинон кусджытæ кæм нæ фаг кæны, уыцы хъæууон цæрæнуæттæм медицинон специалисттæ æрбаздахыны тыххæй паддзахадон хъæппæрис. Дохтыр, фелсыр, акушер æмæ медицинон хойæн паддзахад дæтты иурæстæгон компенсацион фиддон – 5 милуан сомы, медицинон куыстуатимæ фондз азы дзы бакусыны тыххæй бадзырд куы бафысса, уæд.
Дыгуры районы иуæй-иу медицинон специалисттæ иудадзыг нæ фæфаг кæны, æмæ йын ацы программæ тынг фæахъаз.
Районы поликлиникæйы программæ «Хъæууон дохтыр»-мæ гæсгæ ныр дыууæ азы кардиологæй кусы Туаты Стэллæ. Йæхæдæг Кировы районæй у, 2014 азы сыгъзæрин майданимæ каст фæци скъола, 2020 азы сырх дипломимæ – Цæгат Ирыстоны Медицинон академи. Ординатурæйы фæстæ фæллойы фæндагыл æрлæууыд Дзæуджыхъæуы дыккаг поликлиникæйы кардиологæй, 2024 азы июлæй та архайы программæйы. Фыццаг бонтæй фæстæмæ йæхи бауарзын кодта йæ бæрзонд профессион зонындзинæдтæ æмæ рынчынтæм зæрдиаг ахастдзинадæй. Аргъ ын кæны медицинон куыстуаты разамынд дæр. Йæ зæрдæбын архайды тыххæй Туаты Стэллæйæн лæвæрд æрцыд ведомствæйы Кады гæххæтт.
Йе ‘мкусæг Хъайтыхъты Эльвирæ Къора-Урсдонæй у, каст фæци Цæгат Ирыстоны Медицинон академийы дзæбæхгæнæн факультет æмæ равзæрста терапевты дæсныйад. Ординатурæйы ахуыры рæстæг æрвыст æрцыд Дзæуджыхъæуы æвдæм поликлиникæмæ, æмæ дзы кусгæ баззад. 2023 азы ацыд профессион цæттæдзинад пульманологыл нæ бæстæйы раззагдæр уæлдæр ахуыргæнæндæттæй иуы – С.П. Боткины номыл Мæскуыйаг медицинон академийы æмæ æнтыстджынæй куыста терапевт æмæ пульманологæй. Программæ «Хъæууон дохтыр»-ы нырма дыккаг мæй архайы, у фыццаг участокы терапевт, фæлæ ныридæгæн йæхи фæзминагæй равдыста. Йæ раздæры куысты бынатæй дæр Эльвирæйы тыххæй арфæтæ ‘рцыд.
Дигорайы районы центрон рынчындоны сæйраг дохтыры хæстæ рæстæгмæ æххæстгæнæг Ботъоты Олеся куыд радзырдта, афтæмæй 2024 азæй 2026 азмæ районы медицинон куыстуæтты программæ «Хъæууон дохтыр»-ы фæлгæты кусынц æхсæз адæймаджы. Туаты Стэллæ æмæ Хъайтыхъты Эльвирæйæ уæлдай ма уыдон сты Хъарман-Сындзыхъæу, Дур-Дур æмæ станицæ Николаевскаяйы участокты терапевттæ Цъобпойты Лаурæ, Тауаситы Таймураз æмæ Хосроты Зæлинæ, рынчындоны хирургион хайады хирург Дзубиты Валери. Анестезиолог-реаниматолог Хъаирты Тимуры та æрхуыдтой Тагъд æххуысы клиникон рынчындоны реанимацион хайадæй. Ахæм специалист сæ хъæуы, центрон рынчындоны ногæй суткæйы мидæг иудадзыг куыстгæнæн реанимацион службæ кæй байгом уыдзæн хæстæгдæр рæстæг, уый тыххæй. «Се ‘ппæт дæр тынг хорз специалисттæ сты. Рынчындоны разамынд æмæ районы цæрджытæ сæ куыстæй разы сты», – фæбæрæг кодта Ботъоты Олеся.
Дыгуры районы центрон рынчындоны администраци программæ «Хъæууон дохтыр»-ы фæлгæты хъавы паллиативон хайады дохтыр æмæ участокы педиатр æрбахонын Хъарман-Сындзыхъæуы амбулаторимæ æмæ йæ зæрдæ дары, уыцы бынæттæм дæр кæй æрбацæудзысты бæрнон, профессион æгъдауæй бæрзонд цæттæдзинады хицау фæлмæнзæрдæ специалисттæ.
Вероника ПАХОМОВА
