«Беслæн. Фыццæгæм скъола»-йы терроризм не ‘руадзыны Дунеон культурон-патриотон центры байгом кодтой экспозицийы дыккаг къæпхæн.
Уым равдыстой бæстæйы ногдæр историйы карздæр æмæ æвирхъаудæр цау – 2004 азы, сентябры, террористон акт. Ног залтæм æрæмбырд кодтой сывæллæтты æмæ ахуыргæнджыты историтæ, чидæриддæр уыцы бон скъолайы уыд, æххуысмæ сæм чи батагъд кодта, уыдоны нæмттимæ баст æрмæджытæ.
Экспозицийы сæйраг бынат ахсынц, 2004 азы, сентябрæй хъахъхъæд чи æрцыд, ахæм дзаумæттæ, документтæ, къамтæ. Центры специалисттæ стыр куыст бакодтой, скъолайы уæды уæтты хуызтæ сног кодтой, витринæтæ, мультимедион ифтонггæрзтæ сæвæрдтой. Хицæн хайы сæ бынат ссардтой сæрмагонд нысаниуæджы къордты уæнгты, æвæстиат æххуысы службæты кусджыты хъæбатырдзинад.
Ам банкъарæн ис, сæхи цардыл нæ ахъуыды кæнгæйæ, адæмы аирвæзын кæнынмæ чи тырныдта, амынæты уæвджыты ссæрибар кæныныл чи архайдта, уыдоны лæгдзинад. Кæй аирвæзын кодтой, уыдоны хъысмæттæ дæр бæрæг дарынц. Экспозицийы æрмæджытæ æвдисынц, Ирыстоны рыст дунейы алы къуымты цæрæг адæмы зæрдæтæ куыд фæцагайдта, уый.
Экспозицийы иннæ хаймæ бахастой Уæрæсейы, дунейы цы террористон акттæ æрцыд, цы æвирхъау тыхы хицау сты фыдгæнджытæ, сæ ныхмæ иумæйагæй, æмдыхæй æрлæууын кæй хъæуы, ууыл дзурæг æрмæджытæ. Нырмæ дæр экспозицийыл куыст дарддæр цæуы, экспозици дзаг кæндзысты хъæугæ æрмæгæй.
