Терроризмы ныхмæ тох кæныны æмвæнддзинады бон сбæрæг кæныны нысанимæ Цæгат Ирыстоны йæ куыст райдыдта номарæн акци. Йæ саразæг – Уæрæсейаг æхсæнад «Знание».
Республикæйы ахуыргæнæндæтты алы ран дæр æвдисынц Наталья Штондайы документалон киноныв «Беслан. Три дня навсегда». Ист æрцыд æхсæнад «Знание»-йы æххуысæй. Акци баиу кодта 1 500 ахуырдзауæй фылдæр, се ‘хсæн – скъола-дзаутæ, студенттæ æмæ æфсæддон училищæты курсанттæ.
Кинонывы хъайтартæ – Беслæны фыццæгæм скъолайы раздæры ахуырдзаутæ. Уыдон байрæзыдысты, сахуыр кодтой, равзæрс-той сæ царды дæсныйад, скодтой бинонтæ, æмæ ныр, цы азтæ рацыд, уыдоны сæрты акæсгæйæ, сæ мысинæгты ногæй æмæ ногæй здæхынц 2004 азы зындоны цаутæм.
Киноныв саразæг Наталья Штонда зæгъы: «Тугдзыг террористæм амынæты чи бахауд, нæ кинонывы уыцы хъайтартæ уæд нырма уыдысты сывæллæттæ, æмæ уыцы уæззау цаутæ мысын сын уыд тынг зын, зонын æй. Фæлæ киноныв саразынæн уыд иунæг нысан: бæллæхы чи бахауд, уыдон хъуамæ æмбæрстаиккой, иунæг кæй не сты, уый. Стæй ма – нæ бинонты, нæ хæстæг адæймæгты æнæниз æмæ æдас-дзинадæй ахсджиагдæр зæххы цъарыл кæй ницы ис, уый.
Кинонывы хъайтартæй иу – Хуызмиаты Алекс – 2004 азы уыд Беслæны фыццæгæм скъолайы ахуырдзау æмæ уыцы æртæ фыдбоны уыд скъолайы спортивон залы. «Нæлгоймæгты залæй ракодтой фыццаг сахæтты, æз баззадтæн мæ мад æмæ мæ мадыхоимæ. Диссаг у, фæлæ лæмæгъдзинад мæ сæрмæ не ‘рхастон. Æртæ бонмæ иунæг хатт дæр дон нæ бацагуырдтон, нæхимæ мæ фæнды, зæгъгæ, ахæм ныхас дæр мæ не схауд. Мæхи ныффидар кодтон, мæ хъарутæ цас уыдысты, уый бæрц. Дæуæй аразгæ куы ницы уа, уæд Хуыцауыл æууæндынæй дарддæр дæ бон ницы у», – дзырдта Алекс ахуыр-дзаутимæ фембæлыны рæстæг.
Акцийы сæйрагдæр мадзæлттæй иу арæзт æрцыд Цæгат-Кавказы суворовон æфсæддон училищæйы. Курсанттæм æрбацыдысты гвардийы майор, сгарæг Рубен Днепровский æмæ прапорщик, сгарæг Олег Акулов – сæ дыууæ дæр архайдтой амынæты бахауæг адæмы ирвæзын кæныны цауты.
– Уыцы æртæ боны мын канд мысинæгты нæ баззадысты. Уыдон систы мæ царды, мæ уды хай. Цалынмæ сæ мысæм æмæ сыл цалынмæ сыгъдæг цæсгомæй дзурæм, уæдмæ бæллæх ногæй æруадзыны гæнæн нæ уыдзæн, – загъта Рубен Днепровский.
Курсантты раз ныхас кодтой æфсæддон уацхæссæг, РЦИ-Аланийы Сæргълæууæжы пресс-секретарь Илаты Батрадз æмæ Уæрæсейаг æхсæнад «Знание»-йы хайады раза-монæг нæ республикæйы Гæбæраты Каринæ.
– Ахæм фыдбæллæхæн ногæй æруадзæн нæй. Уый тыххæй та йын нæй рохгæнæн. Беслæны тыххæй кинонывтæ, бæллæх бавзарæг адæмимæ фембæлдтытæ сæ зæрдæтæ ногæй къахыны тыххæй не сты. Уыдон арæзт цæуынц уый тыххæй, цæмæй сабыр дунейæн æмæ адæймаджы цардæн аргъ кæнын зонæм», – бафиппайдта Гæбæраты Каринæ.
Фæсивæдимæ ахæм фембæлдтытæ ма арæзт æрцыдысты Хæххон аграрон паддзахадон университеты, Цæгат Ирыстоны паддзахадон медицинон академийы æмæ «Академия знания», зæгъгæ, Æрыдоны уыцы лицейы. 3 сентябры та студенттимæ фембæлдтытæ адарддæр сты Цæгат-Кавказы хæххон-металлургон институты, стæй Дзæуджыхъæу æмæ Алагиры астæуккаг скъолаты.
Дедегкаты Зæлинæ
