РЦИ-Аланийы Хицауады радон æрвылкъуырион аппаратон æмбырд амыдта республикæйы Сæргълæууæг Сергей МЕНЯЙЛО. Архайдтой дзы министрадтæ æмæ ведомствæты разамонджытæ, районты хицæуттæ. Ныхас дзы цыд зымæгмæ цæттæдзинадыл æмæ æндæр ахсджиаг социалон-экономикон фарстатыл.
Хицауады Сæрдары хæдивæг Томайты Ирбег фехъусын кодта республикæйы оперативон уавæр.
– Ивгъуыд къуырийы дæргъы республикæйы æвирхъау цаутæ бæрæггонд не ’рцыд. Фондз районы 32 хъæуы дарддæр дæр тæссаг у зынгсирвæзтытæй, уымæ гæсгæ дзы æххæстгонд цæуы сæрмагонд уавæр. Ивгъуыд къуыри ахуыссын кæнын бантыст 107 зынгсирвæзты. Регионы сæрмагонд службæтæ архайынц бæрзонд цæттæдзинады уавæрты. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 107 фæндаггон фыдбылызы. Хъыгдард дзы баййæфтой 22 адæймаджы æмæ сæ бахъуыд дохтырты æххуыс. Цыппар адæймаджы дзы фæмард сты. Арвыком æмæ Транскамы фæндæгтæ гом сты æппæт автотранспорты хуызтæн дæр. Республикæйы фæндæгтыл электронон рады æнхъæлмæ кæсынц 585 автотранспортон иуæджы. Уæрæсейы Федераци æмæ Гуырдзыстоны арæныл къуырийы дæргъы дыууæрдæм ахызтысты 265560 автотранспортон иуæджы æмæ 73400 адæймаджы, – загъта Томайы-фырт.
Æнæнхъæлæджы уавæрты министрады регионалон управленийы хъусынгæнинагмæ гæсгæ, республикæйы ахуыссын кæнын бантыст 107 зынгсирвæзты. Уыдонæй 36 – хус кæрдæджы сыгъд. Хус кæрдæгыл арт кæй бандзæрста, уый тыххæй закъоны раз дзуапп ратдзæн иу адæймаг.
Цæгат Ирыстоны Мидхъуыддæгты министрады хъусынгæнинагмæ гæсгæ, 7 сентябрæй 13 сентябрмæ республикæйы æрцыд 150 фыдракæнды æмæ 10 æнæнхъæлæджы цауы. Раргом кæнын дзы бантыст 82. Мидхъуыддæгты оргæнтæм къуырийы дæргъы æртæ хатты æрбарвыстой мæнг хъусынгæнинæгтæ террористон актты тыххæй. 10, 11 æмæ 14 сентябры регионы расидтысты æнæтæхæг аппараттæй тæссагдзинад. Æнæтæхæг аппараттæ республикæйы бæрæггонд не ’рцыд.
«Роспотребнадзор»-ы регионалон хайад фехъусын кодта, республикæйы эпидемиологон уавæр нывыл кæй у, уый. Республикæйы грипп бæрæггонд не ’рцыд. Ивгъуыд къуыри ног коронавирусон инфекци разынд 4 адæймагмæ.
РЦИ-Аланийы ахуырад æмæ наукæйы министр Алыбегты Эллæ куыд радзырдта, афтæмæй сæрмагонд æфсæддон операцийы архайджыты 5 мин сывæллонæн сæрдыгон фæлладуадзæн бонты арæзт æрцыдысты æнæниздзинад фидаргæнæн мадзæлттæ.
РЦИ-Аланийы цæрæнуатон-коммуналон хæдзарады, артаг æмæ энергетикæйы министр Хъараты Тимуры ныхасмæ гæсгæ, Дзæуджыхъæуы 774 бирæфатерон хæдзары цæттæ сты зымæджы хъармгæнæн рæстæгмæ. Ноджы ма министр фехъусын кодта, артаджы фæстауæрц республикæйы кæй у 2166 тоннæйы – бензин æмæ 2170 тоннæйы дизель. Фæндагыл ма ис 2260 тоннæйы – бензин æмæ 2043 тоннæйы – дизель. Маркæ «АИ-92»-йы бензин рес-публикæмæ æрбаласта компани «Лукойл».
Сергей Меняйлойы фæдзæхстмæ гæсгæ, хицæн адæймæгты къухты уæвæг артагæвгæнæн станцæтæ бензин æмæ дизелы аргъ фæкъаддæр кодтой: пропан – 39 сомы, АИ-92 – 97 сомы.
Дарддæр республикæйы Сæргълæууæг сбæрæг кодта, цы ахсджиаг фарстатыл хъæуы бакусын, уый: æвзæрстытæм бацæттæ кæнын æмæ сæ æдасæй, æнæлазæй арвитын; зымæджы хъармгæнæн рæстæгмæ цæттæдзинад æмæ афтæ дарддæр.
Æмбырды ныхас цыд æндæр ахсджиаг нысантыл дæр.
ХЪОЙБАЙТЫ Галинæ
