Адæмон фронт бакуыста æмæ сарæзта телефоны фæрцы æххуысы ног хуыз – «Все для Победы!» Ныхас цæуы мобилон бастдзинады лæггæдтæ æмæ сæрмагонд æфсæддонтæн операцийы архайджытæн иудадзыгон æххуыс кæныныл.
Бæлвырддæр зæгъгæйæ, абоненттæ сæ телефонтæн æрвылмæй цы ‘хца фидынц, уымæн йæ хай æрвыст цæудзæн, раззагдæр хаххы знагимæ чи хæцы, уыцы ‘фсæддонтæн, уыцы ран сæ æнæмæнгæй чи хъæуы, ахæм дзаума сын æлхæнынæн. Ацы ног проект царды рауадзынæн оператортæ бацæттæ кодтой sim-картæтæ – авд минæй фылдæр. Ныридæгæн уал абоненттæ 400-йæ фылдæр сæ телефонты фæрцы сæхи баиу кодтой оператормæ «Все для Победы!»
Ахæм проект кусы нырма уал Уæрæсейы 30 регионы, фæлæ парахат кæны дарддæр дæр. Йæ нысан у, сæрмагонд æфсæддон операцийы архайджытæн цы гуманитарон æххуыс цæуы, уымæн иудадзыгон бындур саразын, алы адæймагæн дæр уыцы æххуыс йæ царды хай куыд суа, афтæ. Уыцы хуызы мобилон оператор «Все для Победы!»-йы пайдагæнджытæ сæ бавæрæн хæссынц не ‘фсæддонтæн гуманитарон æххуыс кæныны хъуыддагмæ.
– Телефон ацы операторимæ баиу кæнæн ис Адæмон фронты регионалон хайады фæрцы. Sim-картæ та цæмæй скуса, уый тыххæй адæймагæн йæ бон у бацæуын портал «Госуслуги»-мæ, науæд та нæ организацийы кусджыты æххуысæй спайда кæнын, – зæгъы Адæмон фронты регионалон хайады разамонæг Гæлиты Клим.
Абоненттæн сæ бон у спайда кæнын тарифтæ «Народный» кæнæ «Народный+», фидын сын хъæуы мæймæ 300 сомы. Тарифты пъланмæ хаст цæуынц интернет-трафикы 1 ТБ, интернет лæвар байуарыны гæнæн, иннæ операторты номырмæ лæвар бадзурыны 1 000 минуты æмæ операторæн йæхи мидæг лæвар дзурыны бар. Ис ма, хи номыр бахъахъхъæнгæйæ, иннæ оператормæ рахизыны гæнæн дæр.
Афтæмæй, проекты фæрцы цы ‘хца æмбырд кæна, уымæй æфсæддонтæн æлхæд цæудзæн дзæбæхгæнæн хостæ æмæ медицинон æндæр фæрæзтæ, радиостанцæтæ, бронежилеттæ, генератортæ, æнæтæхæг аппараттæн хъæугæ ифтонггæрзтæ æмæ æндæр хъæугæ дзаума, æмæ сæ уардзысты æфсæддон хайттæн сæ домæнтæм гæсгæ. Абоненттæм та æрвыст цæудзæн дзуаппы хуызы хъусынгæнинаг, се ‘хцайæ æлхæд цы ‘рцыд хæстон лæппутæн, уый фæдыл.
Уæлдæр куыд загътам, афтæмæй оператор «Все для Победы!»-имæ баиу уæвæн ис Адæмон фронты регионалон хайады фæрцы, науæд та адæймагæн йæхи бон дæр у – уый тыххæй sim-картæйы къоппыл амынд QR-кодмæ хъуамæ бацæуа, равзара дзы фыст «Активировать sim-карту», бахæсса йæм йæ паспорты бæрæггæнæнтæ æмæ «Госуслуги»-йы фæрцы, картæ скусыныл разы кæй у, уый ноджыдæр ма иу хатт фæбæлвырд кæна. Уый фæстæ картæ сæвæрын хъæуы телефоны, стæй дзы сæвæрын æхца – фыццаг хатт дзы æвæргæ у 400 сомы, цы тариф равзæрста, уымæ нæ кæсгæйæ. Чи баззайа, уыцы ‘хца сæфгæ нæ кæны, баззайы номырæн йæ хыгъды.
Оператор «Все для Победы!»-имæ баиу уæвын чидæртæ къордæй куы сфæнд кæной, уæд сæ хъæуы бацæуын Адæмон фронты регионалон хайадмæ баныхас кæнын бон, рæстæг æмæ бынатыл, стæй, операторимæ цал номыры иу кæнынц, ууыл. Уый фæстæ хъæуы регистраци ацæуын. Уый тыххæй адæймагæн йæ паспорт йемæ хъуамæ уа.
Хабæрттæ ноджы бæстондæрæй базонæн ис Адæмон фронты регионалон хайады.
БЕРИТЫ Миланæ, «Адæмон фронт»-ы пресс-службæ
