Ныртæккæйы царды бирæ æнтыстджын кæстæртæ ис нæ алыварс. Уый у рæстæджы хорздзинад æмæ дуджы амонд.
Ацы бонты Уæрæсейы фæбæрæг кæнынц санитарон æмæ эпидемиологон службæйы кусджыты профессионалон бон. Службæйыл æххæст кæны 104 азы.
Цæгат Ирыстоны бирæ азты дæргъы разæнгардæй кусынц бирæ дохтыртæ, уыдон тох кæнынц тæссаг, хæцгæ низты ныхмæ, архайынц адæймаджы цард æмæ æнæниздзинад бахъахъхъæныныл.
Уыцы службæйы кусджытæй иу у медицинон наукæты кандидат Хæбæлаты Надинæ Русланы чызг. Хæрз чысылæй нырмæ йæ цард баста æрмæстдæр дохтыры куыстимæ. Æрыдоны дыккæгæм астæуккаг скъола æвзист майданимæ каст куы фæци, уæд æрыгон чызг æнæгуырысхойæ бацыд Цæгат Ирыстоны Медицинон академимæ. Медицинон профилактикæйы факультеты студенттæ Надинæйы равзæрстой профцæдисты комитеты сæрдарæй. Ахуырмæ зæрдæргъæвд, кафаг æмæ фæндырдзæгъдаг чызг уыдис сгуыхт ансамбль «Цард»-ы солисткæ. Йæ иттæг хорз ахуыр æмæ æхсæнадон куысты тыххæй йын фыстой паддзахадон стипенди. Академи сырх дипломимæ каст фæци æмæ дарддæр бацыд Бетъырбухы Эпидемиологи æмæ микробиологийы наукон-иртасæн институты аспирантурæмæ дыууæ дæсныйадмæ – «Эпидемиологи» æмæ «Медицинон микробиологи».
Абон Хæбæлаты Надинæ у Æппæтуæрæсеон наукон æмæ практикон эпидемиологон æхсæнады цæгатирыстойнаг хайады сæргълæууæг. У дохтырты аккредитацийы къамисы сæрдар. Разæнгардæй кусы уæлдай тæссагдæр инфекциты хайады Цæгат Ирыстоны «Роспотребнадзор»-ы Гигиенæ æмæ эпидемиологийы центры, Бæстæхъахъхъæнынады министрады паддзахадон санитарон-эпидемиологон цæстдарды центры. Йе ‘мкусджытимæ архайы ахæм инфекциты ныхмæ, куыд æрра низ, тæлæу (сибирская язва), йемынæ (чума), боррелиоз, бруцеллез, туляремия, конгойаг тæвдниз, тæфсæг, халер æмæ æндæр хæцгæ низтимæ. Хæбæлаты Надинæйы хъæппæрисæй цард федтой Цæгат Кавказы фыццаг наукон-практикон конференци «Отараевские чтения» æмæ Цæгат Кавказы фыццаг наукон конгресс «Кавказский эпидемиологический щит». Уый банымайæн ис йæ архайды сæйрагдæр æнтыстдзинадыл. Пандеми зæххы къорийыл куы апырх ис, уæд уыдис раззагдæртимæ. Ковид-19 низы ныхмæ тохы тыххæй Надинæйы схорзæхджын кодтой майданæй. Йæ куысты арæхстджын архайды тыххæй йæм ис Паддзахадон Думæйы, Цæгат Ирыстоны «Роспотребнадзор»-ы, Бæстæхъахъхъæнынады æмæ Æфсады министрадты кады гæххæттытæ. Ныртæккæ та кусы медицинон наукæты докторы диссертаци бахъахъхъæныныл. Ахуыр кæнынæй æхсызгондзинад исы, зонындзинæдтæ йæ бирæ хорз хъуыддæгтæм разæнгард кæнынц. Æрыгон адæймагмæ ис хъару, тырнындзинад,ныфс, æмдзу кæны рæстæгимæ, адæмы хсæн цæры кадимæ.
– Дæс æмæ дыууиссæдз азы бæрц Æппæтуæрæсеон наукон-практикон эпидемиологон æхсæнады дæлбар архайы Цæгат Ирыстоны хайад. Уыдон сты эпидемиологтæ, инфекционисттæ, бактериологтæ, вирусологтæ, паразитологтæ, медицинон микробиологтæ, гигиенæйы дохтыртæ æмæ бирæ æндæр структурæты кусджытæ, – тæссаг хæцгæ низтимæ тох кæныны фæлтæрддзинад кæмæ ис, ахæм дохтыртæ. Зæгъын хъæуы уый, æмæ Цæгат Ирыстоны хайады абон ис 450 кусæджы, уыцы нымæц у Уæрæсейы æппæт регионтимæ абаргæйæ фылдæр. Тынг разæнгардæй архайæм студенттимæ æмæ æрыгон дохтыртимæ, уымæн æмæ адæймаджы æнæниздзинад у дунейы ахсджиагдæр хъæздыгдзинад, æмæ алы специалист дæр хъуамæ уа цæттæ цыфæнды инфекцийы ныхмæ хъæддыхæй æрлæууынмæ. Иунæджы бон ницы у. Æмдыхæй кусæм æмæ архайæм, цæмæй эпидемиологон æхсæнад Цæгат Ирыстонæн уа фидар ныфс æмæ бахъуаджы рæстæг æххуыс, – загъы Хæбæлаты Надинæ.
Адæймаг куы райгуыры, уæд йæ ныййарджытæн, йæ бинонтæн æмæ хиуæттæн свæййы ныфс, йемæ фæбæттынц сæ фидæны бæллицтæ. Стыр амонд у ныййарæджы фæндиаг фæуын. Уыцы амондæй хайджын фæдæ, Надинæ. Уымæн æвдисæн, абоны онг дæ къухы цы æнтыстдзинæдтæ бафтыд, уыдон.
Гугкаты Жаннæ
