Цæгат Ирыстоны, Хетæгкаты Къостайы номыл паддзахадон университеты разамындæн уыд фембæлд фыццæгæм курсы студенттимæ. Университеты къæсæрæй фыццаг хатт чи бахызт, уыцы фæсивæд базыдтой студенты царды тыххæй, ахуыры рæстæг сæ дарддæры рæзты гæнæнты фæдыл бæлвырд хабæрттæ.
Мадзал байгом кодта ректор Огъуаты Алан. Уый зæрдиаг арфæтæ ракодта фыццагкурсонтæн æмæ загъта, университет цæттæ кæй у студенттæ цы хъæппæристæ ‘вдисой, уыдонæн царды рауадзынæн баххуыс кæнынмæ, сæ профессионалон рæзтæн сын æмбæлгæ уавæртæ аразынмæ. Уыимæ, ацы ран сæйраг ахадындзинад ис студенттæн сæхи фæндæттæн.
«Университеты арæзт æрцыдысты æппæт фадæттæ æмæ уавæртæ дæр, цæмæй студенттæ сæхи ссарой сæ равзæрст дæсныйæдты. Ректораты командæ æмæ декантæ уын æххуыс кæндзысты. Фæлæ дуры бынмæ дон нæ хъары, уымæ гæсгæ, уæхицæй бирæ аразгæ уыдзæн. Нæ зæрдæ дарæм, уемæ университеты цард хуыздæрæрдæм кæй ивдзæн, ууыл. Уæ фиппаинæгтæ æмæ фæндтæ хъуамæ наукон æмæ ахуырадон архайды ирдæй зыной, махæн та нæ хæс у сымахæн æххуыс кæнын, ног гæнæнтæ уын уæ размæ хæссын», – загъта ректор.
Сæ куысты фæдыл фыццагкурсонтæн радзырдтой профилон проректортæ. Студенттæ базонгæ сты ахуырадон æмæ наукон гæнæнтимæ, олимпиадæтæ, конкурстæ æмæ грантон æххуысты тыххæй программæтимæ.
Хицæн цæстдард цыдис социалон æххуыс, фæсивæдон политикæйы, æмдзæрæнмæ бацæуыны æмæ сæйраг фæткæвæрды фарстатæм. Сæ куысты тыххæй ма радзырдтой студентты Профцæдисты организациты минæвæрттæ дæр. Фембæлд фæцис, РЦИ-Аланийы Æвзарæн къамисы кусæг Цалиты Еленæйы раныхасæй. Уый фыццагкурсонтæн радзырдта, æвзæрстытæм фыццаг хатт чи æрбацæудзæн, уыцы фæсивæдмæ разæй цы æнхъæлмæ кæсы, уый тыххæй бæлвырд хабæрттæ.
ЦИПУ-йы пресс-службæ
