Рагон къамтæ нæ сæхимæ здахынц, комкоммæ нæ æдзынæг ныккæсын кæнынц рагон адæмы цæсгæмттæм æмæ нæ хъуыдытыл бафтауынц. Хатт нæм æрбайхъуысы сæ царды уынæр, сæ зæрдæты цæф: цæмæ тырныдтой, цæуыл уыд сæ сагъæс, сæ катай. Уæд дæр æмæ ныр дæр нæ алкæмæн дæр йæ каст уыд æмæ у фидæнмæ. Кæй зæгъын æй хъæуы, æвзæры нæм фарст: «Цы уыдзæн нæ фидæн? Нæ фæстæ цы фæлтæртæ уа, уыдоны цардыуаг, зондахаст æмæ æгъдау куыд фæивдзæн». Æмæ нæм сæвзæры бæрнондзинады æнкъарæн, цæмæй сæ разы къæмдзæстыг ма уæм, уымæ нæ сразæнгард кæнынц.
Ацы къам нæм æрбахаста Хадыхъаты Светланæ. Зоны дзы æрмæстдæр иу адæймаджы — йæ фыдыфыд Хадыхъаты Еналды, рахизырдыгæй лæууы дыккаг. Иннæтæй кæд исчи искæй базона, уæд нæм ныффыссæд газетмæ.
Хадыхъатæ Фарныхъæумæ (1922 азы) ‘рлыгъдысты Хохы Санибайæ. Къам ист æрцыд бæлвырдæй Октябры революцийы агъоммæ. Ууыл дзуры, къамы чи ис, уыдоны уæлæдарæс. Æмæ дзы, æвæццæгæн, сты фылдæр Саниба æмæ Хохы Дæргъæвсы зылды уæды цæрджытæ, чи зоны, Турчы хæсты архайджытæ.
Хадыхъаты Еналды райгуырд 1885 азы. Уыд Дзампаты хæрæфырт, Дзгойты сиахс, рантыст ын иу лæппу æмæ дыууæ чызджы. Уыдоны цотæй у Светланæ.
