РЦИ-Аланийы ахуырад æмæ наукæйы министр Алыбегты Эллæ, программæ «Хъæуккаг ахуыргæнæг»-ы уæлахиздзаутæ – 19 ахуыргæнæгæн радта сертификаттæ.
– Алчидæр дзы райста фæйнæ 1 милуан сомы æмæ йæ куысты хæстæм бавнæлдта нæ республикæйы алы скъолаты. Математикæ, уырыссаг æвзаг æмæ литературæ, физикæ, истори, биологи, англисаг æвзаг æмæ райдиан кълæсты ахуыргæнджытæ æрцыдысты кусынмæ, æцæгæйдæр сæм кæм æнхъæлмæ кастысты, ахæм хъæутæм. Уыцы 19 «хъæуккаг» ахуыргæнæгæй 5 сты нæлгоймæгтæ. Ныхас дæр ууыл цæуы æмæ нæлгоймæгты нымæц скъолаты хъуамæ фылдæр уа. Уымæ гæсгæ нын æхсызгон вæййы нæлгоймæгтæ ахуыргæнæджы дæсныйад куы равзарынц æмæ скъоламæ кусынмæ куы æрбацæуынц, уый.
Æхсызгон ма у, дæсны специалисттæ хъæууон скъолатæ кæй равзарынц æмæ сæ хъысмæт цалдæр азы уыцы куыстимæ куы сбæттынц, уый дæр. Абон базонгæ дæн Хадаты Рустамимæ, уый историйы ахуыргæнæгæй кусы Сунжæйы скъолайы æмæ радзырдта, ныридæгæн сывæллæтты хорз цæттæдзинад бæрæг кæй у æмæ цымыдисæй йæ куыст кæй кæны, уый тыххæй. Ноджы ма нæм æрбацыд Надежда Дедова – программæ «Хъæуккаг ахуыргæнæг»-ы 2020 азы уæлахиздзау. Надеждæ хъæууон скъолайы райдыдта йæ куыст англисаг æвзаджы ахуыргæнæгæй, абон та разамынд дæтты Мæздæджы районы Раздольнæйы скъолайæн.
Ахæм историтæ ахсджиаг сты. Æвдисынц нын, ацы программæ æрмæст педагогты æрбаздахынæн нæ, фæлæ адæймагæн йæ дæсныйады бынат ссарын æмæ йæхи скъолаимæ сбæттынæн кæй у, уый дæр.
Фарон нæ республикæйы скъолатæм программæйы бындурыл æрбацыд 10 ахуыргæнæджы. 2026 азы та – 19. Иннæ аз æнхъæлмæ кæсæм ноджыдæр 29 ахуыргæнæгмæ. Архайдзыстæм, дарддæр дæр сын уавæртæ аразыныл, цæмæй тыхджындæр ахуыргæнджытæ хъæууон скъолатæм цæуой кусынмæ, – загъта министр.
Дадтеты Тамилæ
