Ивгъуыд къуыри Болгарийы сæйраг горæт Софияйы ахицæн Европæйы чемпионат боксæй хæцынæй.
Архайдтой дзы 43 бæстæйæ 381 спортсмены. Уыдоны ‘хсæн уыд дзæуджыхъæуккаг ирон чызг Къуылыхты Кристинæ Хъазыбеджы чызг дæр æмæ ссис Европæйы чемпион 60 килограммы уæзонты ‘хсæн. Уый финалы цыппæрæм хайы фембæлд украинаг спортсменимæ æмæ йæ рамбылдта 5:0 хыгъдæй, Косовойы минæваримæ та фембæлд æрдæг финалы, уый та рамбылдта 4:1-æй. Финалы йæ ныхмæлæууæг уыд французаг спортсменкæ Стелин Гроси, æмæ ууыл дæр фæуæлахиз 4:1 хыгъдæй.
Кристинæ йæ спортивон къахдзæфтæ райдыдта аивадон гимнастикæйæ, уым дæр йæ хъуыддæгтæ æвзæр нæ цыдысты, фæлæ йæ зæрдæ æхсайдта боксмæ æмæ Дзæуджыхъæуы клуб «Арс»-ы тренертæ Быценты Алан æмæ Кæркуысты Павелы разамындæй райдыдта тренировкæтæ кæнын.
Æрыгон чызг, 2016 азы Уæрæсейы чемпионаты хистæр кары спортсментимæ ерысгæнгæйæ, райста бронзæ майдан. Фæстæдæр йæ тренер Быценты Аланимæ афтыд Сербимæ æмæ хæцы уыцы бæстæйы командæйæн. 2024 азы дæр ссис Европæйы чемпион, уæд та 63 килограммы уæзы. Фидар къахдзæфтæ кæны не ‘мзæххон йæ равзæрст фæндагыл, æмæ ма йын бирæ бантысæд!
Касаты Батрадз
