РЦИ-Аланийы Хицауады радон æрвылкъуырион аппаратон æмбырд амыдта республикæйы Сæргълæууæг Сергей МЕНЯЙЛО. Министрадтæ æмæ ведомствæты разамонджытæ, муниципалон районты сæргълæуджытимæ ныхас кодта зымæджы хъармгæнæн рæстæгмæ цæттæдзинад æмæ æндæр ахсджиаг социалон-экономикон фарстатыл.
Хицауады Сæрдары хæдивæджы хæстæ рæстæгмæ æххæстгæнæг Томайты Ирбег фехъусын кодта республикæйы оперативон уавæр:
– Ивгъуыд къуырийы дæргъы республикæйы æвирхъау цаутæ бæрæггонд не ’рцыд. Цæгат Ирыстоны цыппар районы æмæ 26 хъæуы дарддæр дæр тæссаг у зынгсирвæзтытæй, уымæ гæсгæ дзы æххæстгонд цæуы сæрмагонд уавæр. Ивгъуыд къуыри ахуыссын кæнын бантыст 21 зынгсирвæзты, иу адæймаг дзы хъыгдард баййæфта. Регионы сæрмагонд службæтæ архайынц бæрзонд цæттæдзинады уавæрты. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 85 фæндаггон фыдбылызы. Хъыгдард дзы баййæфтой 18 адæймаджы, æмæ сæ æвæстиатæй рынчындонмæ аластой. Иу адæймаг дзы фæмард. Арвыком æмæ Транскамы фæндæгтæ гом сты æппæт автотранспорты хуызтæн дæр. Республикæйы фæндæгтыл электронон рады æнхъæлмæ кæсынц 370 автотранспортон иуæджы. Уæрæсейы Федераци æмæ Гуырдзыстоны арæныл къуырийы дæргъы дыууæрдæм ахызтысты 25310 автотранспортон иуæджы æмæ 64540 адæймаджы, – загъта Томайы-фырт.
Ивгъуыд къуырийы дæргъы республикæйы бæрæггонд æрцыд 154 фыдракæнды, раргом кæнын дзы бантыст 98. Амынд рæстæгмæ республикæйы 37 ахуыргæнæндонмæ барвыстой хъусынгæнинæгтæ терроризмы тыххæй. Барадхъахъхъæнæг оргæнтæ куыд сбæрæг кодтой, афтæмæй мæнг разындысты. Дарддæр арæзт цæуынц слестгæнæн мадзæлттæ. Уый тыххæй æмбырды фехъусын кодта Республикæйы Мидхъуыддæгты министрад.
Æнæнхъæлæджы уавæрты министрады регионалон управленийы хъусынгæнинагмæ гæсгæ, республикæйы ахуыссын кæнын бантыст 22 зынгсирвæзты, уыдонимæ – хус кæрдæджы сыгъд дæр.
«Роспотребнадзор»-ы регионалон хайад фехъусын кодта, республикæйы эпидемиологон уавæр нывыл кæй у, уый. Ивгъуыд къуырийы дæргъы Грипп æмæ ног коронавирусон инфекци бæрæггонд не ’рцыдысты. Ахуыргæнæндæттæ æмæ рæвдауæндæтты алы райсом дæр цæстдард цæуы сывæллæтты æнæниздзинадмæ.
РЦИ-Аланийы ахуырад æмæ наукæйы министры хæстæ рæстæгмæ æххæстгæнæг Алыбегты Эллæ куыд радзырдта, афтæмæй рынчын сывæллæтты нымæц скъолаты у 9 проценты, рæвдауæндæтты та – 12 проценты.
Сергей Меняйло РЦИ-Аланийы цæрæнуатон-коммуналон хæдзарад, артаг æмæ энергетикæйы министры хæстæ рæстæгмæ æххæстгæнæг Хъараты Тимурæн бафæдзæхста артагæвгæнæн станцæты пайда кæнын бархионты æххуысæй. Уыдон сæ цæст дардзысты æгъдаухæлдтытæм.
– Артаджы уавæр нырма уæззау у. Ныртæккæ дыууæ хъуыддаджы сты ахсджиаг. Фыццаг – æргътæ уæлæмæ цæуын ма бауадзын. Монополиты ныхмæ Федералон службæйæн хæс кæнын, æнæмæнг хъусын кæнут, æргътæ кæм сисынц, уый. Дыккаг хъуыддаг – рад. Æмбарæм æй, адæм артаг æвгæнынц, асламдæр кæм у, уым. Республикæйы Цæрæнуатон-коммуналон, артаг æмæ энергетикæйы министрад, ацы фарстамæ лæмбынæгдæр кæсут, – фæбæрæг кодта Сергей Меняйло.
Æмбырды ныхас цыд æндæр ахсджиаг нысантыл дæр.
ХЪОЙБАЙТЫ Галинæ
