Уыд Республикæ Цæгат Ирыстон-Аланийы æвдæм равзæрст Парламенты фæндзай æхсæзæм æмбырд. Амыдта йæ Парламенты Сæрдар ТУСКЪАТЫ Таймураз.
Депутаттæ равзæрстой æмæ ивддзинæдтæ бахастой 2026 азы æмæ 2027-2028 азты пъланон рæстæгмæ республикон бюджетмæ. Закъоны проекты фæдыл ныхас кодта республикæйы финансты министры хæстæ рæстæгмæ æххæстгæнæг Оксана Карова.
Куыд загъта, афтæмæй бахæссинаг ивддзинæдты нысан у бюджеты сæйраг бæрæггæнæнтæ фæбæлвырддæр кæнын, цæмæй финанстæй хæдзардзиндæрæй пайдагонд цæуа, социалон нысантæ та – æнæкъуылымпытæй æххæстгонд. Афтæ, хъалонты æмæ æнæхъалонты æфтиæгтæ ацы аз фæфылдæр уыдзысты 2 миллиард æмæ 699 милуан сомæй. 2027-2028 азты пъланон рæстæгмæ, куыд нысангонд цæуы, афтæмæй хи æфиæгтæ фæфылдæр уыдзысты 1 миллиард æмæ 902 милуан сомæй – алы уыцы аз дæр. Бахæссинаг ивддзинæдтæ нымайгæйæ, 2026 азы бюджеты æфтиæгтæ фæфылдæр уыдзысты 3 миллиард æмæ 676 милуан сомæй, хæрдзтæ та – 4 миллиардæй æмæ 424 милуан сомæй. Хæрдзтæн сæ фылдæр, раздæрау, уыдзысты социалон. Адæмæн социалон æххуысты хæрдзтыл бафтдзæн 1 миллиард æмæ 735 милуан сомы. Ацы æхцайæн йæ тæккæ фылдæр – 1 миллиард æмæ 583 милуан сомы – сты сæрмагонд æфсæддон операцийы архайджытæн æмбæлгæ бафыстытæ.
Æппæт ацы ивддзинæдтæ нымайгæйæ, 2026 азы республикон бюджеты бæрæггæнæнтæ сты ахæм: æфтиæгтæ – 57 миллиарды æмæ 914 милуан сомы, хæрдзтæ – 59 миллиарды æмæ 881 милуан сомы. Бюджеты кадаварыл бафтыд 747 милуаны æмæ 536,7 мин сомы, афтæмæй, бюджеты кадавар рауад 1 миллиард æмæ 966 милуан сомы.
Бахæссинаг ивддзинæдты фæдыл ныхас кæнгæйæ, Тускъаты Таймураз куыд загъта, афтæмæй ног бюджет бахъахъхъæдта йæ социалон ахадындзинад. Йæ ныхасмæ гæсгæ, бюджет дзуапп дæтты сæйраг национ проекттæ æххæст кæнынæн. Стыр куыст арæзт æрцыд национ проект «Æнæниздзинад хъахъхъæнынад»-ы нысантæ сæххæст кæнынæн æмæ дарддæр дæр æххæстгонд цæудзысты. Уыимæ, закъонæвæрынадон оргæнты разамонæг йæ ‘ргом аздæхта хи æфтиæгтæ фылдæр кæныны фарстамæ.
– Республикæйы районты цæугæ æмбырдтæ аразыны рæстæг Парламенты Совет сæрмагондæй æрныхас кæны, куыд муниципалон бюджеты, афтæ республикон бюджеты æфтиагджын хайыл. Уыцы æфтиæгтæ фæфылдæр кæнынæн нæм гæнæнтæ, æнæмæнг, ис, æмæ уыцы куыст иумæ дарддæр æххæст кæндзыстæм. Уымæй рахизгæйæ, паддзахадон хæрдзтæ хъæуы лæмбынæг æвзарын æмæ сæм иудадзг цæст дарын. Афтæ куы уа, уæд æппæт бюджетон процесстæ дæр уыдзысты нывыл, – загъта Парламенты Сæрдар.
Уымæй уæлдай, депутаттæ æрныхас кодтой республикæйы Æвзарæн къамис сфидар кæныны фæдыл Парламенты уынаффæйыл, ныридæгæн дзы чи уыд, къамисы уыцы уæнгтæн сæ куысты æмгъуыд кæронмæ кæй ахæццæ, уымæ гæсгæ. Къамисы ног уæнгтæ равзарыны хъуыддаг арæзт цæудзæн закъонмæ гæсгæ – федералон æмæ регионалон закъонæвæрынады амынд чи ис, уыцы бындурыл æнцой кæнгæйæ.
ДЕДЕГКАТЫ Зæлинæ
