«Регионалон къуыри»-йы фæткмæ гæсгæ, Цæгат Ирыстоны закъонæвæрынадон оргæнæй Уæрæсейы Федерацийы сенатор Виталий Назаренко бабæрæг кодта Сæрмагонд æфсæддон операцийы ветеранты республикон ассоциаци.
Парламентарийæн уыд хъуыддаджы фембæлд организацийы разамонæг Магкæты Олег æмæ цæстдарджытимæ. Фембæлды рæстæг ныхас цыд ветеранты ахсджиаг курдиæттыл, стæй ассоциацийы районы хайæдты æмгуыстады фарстатыл. Уæлдай фылдæр æргом аздæхтæуыд æфсæддонты комплексон реабилитаци æмæ профессион ахуырады хъуыддæгтæм.
– Сæрмагонд æфсæддон операцийы ветеранты ассоциаци арæзт кæй æрцыд, уый ахъаз кæны нæ хъахъхъæнджытæ æмæ сæ бинойнæгтæн æххуыс фæпарахат кæнынæн. Куыст регионы куыд цæуы æмæ, лæппутæн фыццаджыдæр баххуыс кæнын цæмæй хъæуы, уыдæттæ базонын мæ фæндыд. Нæ иумæйаг хæс у хицаудзинад æмæ æхсæнадон организациты æмгуыстадæн фадæттæ саразын, алы хъæбатыр дæр узæлд куыд æнкъара, афтæ, – загъта Виталий Назаренко.
Сенаторы ныхасмæ гæсгæ, ассоциаци цæмæй æнæкъуылымпыйæ куса, уымæн ахъаз кæны йæ сæрдар Магкæты Олег. Ветерантæ кæуыл сæмбæлынц, уыцы лыггæнинаг фарстатæ хатгæйæ, Магкæйы-фырт организацийы ахадгæ архайдæн ахъаз кæны.
– Алы курдиат дæр зын фæлварæнтæн бафæразæг адæймаджы хъысмæтимæ баст кæй у, уый хатæм. Æз мæхæдæг архайдтон сæрмагонд æфсæддон операцийы æмæ лæппутæй æрбафтæг курдиæттæ бæстон æмбарын. Ветерантæн æцæг æххуыс кæм бакæнынц, ассоциаци нымад у æмхъуыдыгæнджыты ахæм æмæхсæнадыл. Нæ хъахъхъæнджытæй алчидæр йæхи хъæугæ адæймагæй цæмæй æнкъара, уымæн ахъаз кæнæм, – фембæлды рæстæг загъта Магкæйы-фырт.
Фембæлды архайджытæ дарддæры æнгом æмархайдмæ цæттæ сты. Хæсты архайгæйæ, хъæбатырдзинад чи равдыста, уыдонæн æххуыс нымад у паддзахадон политикæйы фыццаградон хæсыл.
Æлборты Зæлинæ,
УФ-йы сенаторы æххуысгæнæг
