Национ проект «Фæсивæд æмæ сывæллæттæ»-мæ хауæг проект «Зонды хъару» æххæстгæнæн Мобилон кванториумы зондамонджытæ бабæрæг кодтой республикæйы æхсæз скъолайы.
Дзыллон ахуырадон мадзалы архайæг 190 скъоладзауы, нырыккон технологитимæ базонгæ уæвгæйæ, сæ хъарутæ инженерон æмæ нымæцон сфæлдыстады бавзæрстой, стæй хи проекттæ сарæзтой. Мастер-класстæ амыдтой Дзæуджыхъæуы Абайты Мураты номыл физикон-математикон лицейы эксперттæ.
Программæ равдыста æртæ технологон къабазы:
– промышленнон дизайн æмæ робототехникæ (дизайны бындуртæ кæмæн амыдтой, уыцы фæсивæд чингуыты уæлцъæртты макеттæ арæзтой);
– геоинформацион æмæ аэротехнологитæ (тæхæн аппараттæ куыд арæзт сты æмæ дзы куыд пайда кæнынц, скъоладзаутæн уыдæттæ амыдтой);
– информацион технологитæ æмæ виртуалон æцæгдзинад (программæ Blender-ы кусгæйæ, проекты архайджытæ хи 3D-диорамæтæ арæзтой).
Ахуырад ацыд Ленингоры районы, Цхинвалы, стæй Знауыр æмæ Дзауы скъолаты. Фæсивæдæй иутæ ног технологитимæ базонгæ сты фыццаг хатт, иннæтæ та сæ зонындзинæдтыл бафтыдтой.
Проект «Зонды хъару»-йы сæйраг хæс у нырыккон технологитæ æмæ инженерон ифтонггæрзтимæ скъоладзауты базонгæ кæнын (кусæнгæрзтæ æмæ ахуырадон программæтæ скъолатæм комкоммæ æрбаласгæйæ).
Уæрæсейы Рухсады министрады æххуысæй проект æххæст кæнынæн ахъаз кæны гуманитарон наукæтæн æххуысы фонд «Мæ истори».
РЦИ-Аланийы Ахуырад æмæ наукæйы министрады пресс-службæ
