Айразмæ газеты фæрстыл фыстам, сæрмагонд æфсæддон операцийы цыппæркъахыг «хæстонтæ» дæр сæхи æвæрæн куыд хæссынц нæ лæппутимæ уæлахиз хæстæгдæр кæнынмæ, уый тыххæй.
Цæгатирыстойнаг æфсæддонтæ-штурмовикты БМП-йы экипажы куыдз Папайы тыххæй арæх радзурынц социалон хызты. Уый хуымæтæг куыдз нæу, фæлæ æцæг цыппæркъахыг хæстон. Дыууæ азмæ уæззау цæфтæ цалдæр хатты фæцис, тыхтæй-амæлттæй йæ дохтыртæ мæлæты дзæмбытæй скъахтой. Иу цæфы фæстæ та йæ, зæгъæн ис, æмæ уæнггай бахуыдтой. «Пес – радар», афтæ йæ хонынц æфсæддон дæлхайады, службæ кæны Запорожьейы облæсты ирон æфсæддонты БМП-йы экипажы. Куыдз ирон лæппутæм æрбафтыд, радон рæмыгъдтыты фæстæ йæ хицау куы фæмард, уæд, куыдз дæр уыдис цæфтæ. Ирон æфсæддон-размæбырсæг Хъулаты Ацæмæз, йæ хæстон фæсномыг – Абырæг æй уæззау цæфтимæ тохы быдырæй рахаста æмæ йæ æфсæддон дохтыртæм госпитæльмæ бахаста. Фервæзын кодтой куыдзы, æмæ Ацæмæзы хуыздæр æмæ æнувыддæр «æмбал» сси. Ацæ йыл сæвæрдта ном «Папай», уый уыдис уыцы бонты æфсæддон операцийы сусæг ном, æмæ куыдз дæр уыцы хæсты фæцис уæззау цæфтæ, йæ раздæры хицау та фæмард. Папай банкъары, адæймаг кæй нæ уыны æмæ хъусы, уыцы уынæр. Ацæмæз дзырдта, зæгъгæ, кæй сæм ис сæрмагонд техникæ, дронтæ чи бæрæг кæны, фæлæ уыцы бон техникæ дæр нæ равдыста, мæлæтхæссæг хæцæнгарз æрбахæстæг кæны, уый.
– Папай машинæйы сæрыл бадт æмæ уæлæрвтæм каст, уый æдзухдæр уæлæрвтæм фæкæсы, уымæн æмæ зоны, мæлæт уæлейæ кæй æртæхы. Æнæнхъæлæджы куыдз йæхи æнахуыр дарын райдыдта, мах æй хъуыстам æмæ дис кодтам, цы кæны, ууыл. Фæлæ фембæрстам, цыдæр кæй банкъардта, æмæ нæ техникæ æдас ранмæ бакодтам. Уæдмæ арвы нæ хайадмæ хæстæг дрон фæзынд, æмæ йæ æрæппæрстам. Папай йæхæдæг схизы техникæйы алы хæйттæм, десантон хайадæй райдай æмæ механикы бынаты дæр æрбады. Немæ араст кæны алыхуызон æфсæддон техникæйыл, уæлдай фылдæр уарзы æфсæн машинæйы сæр бадын. Тыххæй йæ куы æрхизын кæнæм æмæ йæ машинæйы хуылфмæ куы баргъæвæм, уæд та нын фæтæргай вæййы, нæ йæ фæфæнды йæ бæрзонд фæлгæсæнæй æрхизын. Æрæджы ныл нæ республикæйы цæрæгойтæ хъахъхъæнæг бархионтæ хъæстытæ фыстой, куыдзы, дам, тухæнæй марынц, зæгъгæ. Мах цалдæр хатты радзырдтам, уый йæ иугæндзоны уавæр кæй у, Папай тынг уарзы машинæты сæрыл бадгæйæ цæуын.
Папай не ‘ппæтæн дæр уарзон куыдз у. Буц æй дарæм, нæ хæринаджы хуыздæр хæйттæ дæр уымæн дæттæм. Æгомыг у, фæлæ адæймаджы алы ныхас дæр æмбары. Нæхæдæг дæр ын йæ уаг базонæм. Папай у нæ ирвæзынгæнæг, йæ фæрцы цалдæр хатты мæлæтæй аирвæзтыстæм. Дрон километрмæ банкъары æмæ машинæйы сæр йæхи æнцад нал фæдары, фæлæ катай кæнын байдайы, нал фенцайы йæ рæйынæй дæр. Уыцы миниуджытæ йæм куы фæзынынц, уæд уайтагъд бамбарæм, дрон æрбахæстæг ис, уый. Папайы нæ хæстон æмбалыл нымайæм, уый дæр немæ службæ кæны нæ бæстæйы амондджын фидæны сæраппонд, æмæ нæ уый куыд хъахъхъæны, афтæ йæ мах дæр хъахъхъæнæм. Уыдис ахæм цаутæ дæр, адавынмæ йæ куы хъавыдысты, æмæ сыл фæхæцыд, уæдæ мын æй æртæ милуан сомæй дæр æлхæдтой, фæлæ Папай исбон нæу, уд ын ис, стæй æз ме ‘мбалы дунейы хæрзтыл дæр нæ баивдзынæн. Уыцы ‘хца гадзрахатдзинады аргъ сты. Нæхимæ куы ацæуæм, уæд мæ нал фæфæнды сæрмагонд æфсæддон операцийы зонæмæ йæ ласын, æртæ хатты уæззау цæфтæ фæцис, тыххæй аирвæзт, æмæ йын тынг тæригъæд кæнын, фæлæ мыл, цыма, æууæндгæ нæ фæкæны, æнæ уымæй куы ацæуон, уымæ гæсгæ мæ машинæйы сæрæй æхсæвæй-бонæй нал фæхизы, – загъта æфсæддон Ацæмæз.
Ахæм хъæбатыр цыппæркъахыг хæларæн аргъ нæй. Уый нæ лæппутæн сæ хъахъхъæнæг зæд у, йæхи куыдзы цард адæймаджы сæрвæлтау æнæвгъауæй чи дæтты, мæлæтæй цалдæр хатты йæ экипаж чи бахызта, уый уæдæ куыд рахонæн ис? Папайыл фыстой хæстон журналисттæ, Мæскуыйы центрон каналты йыл равдыстытæ дæр сарæзтой. Æмæ куыннæ, уый аккаг у Папай.
Дадтеты Тамилæ
