Хетæгкаты Къостайы номыл Цæгат Ирыстоны паддзахадон университеты уыд ахсджиаг цау, æмæ кæд ном æрымысынæн уыд, уæддæр йемæ хаста цавæрдæр æхсызгондзинад.
Зындгонд ахуыргонд, педагог, историон наукæты доктор, профессор, Ахуы-рады Уæрæсейы академийы уæнг-уацхæссæг, Уæрæсейы наукæты сгуыхт архайæг, университеты раздæры ректор, йæ фыццаг æмæ иунæг президент Мæхæмæтты Ахуырбеджы райгуырды 90 азы боны кадæн ын знон университеты кæрты кадджын уавæры байгом кодтой цыртдзæвæн.
Зындгонд ахуыргондæн йæ ном ссарыны тыххæй университетмæ бацæуæны æрбамбырд сты Цæгат Ирыстоны разамынд, сæ сæргъы республикæйы Сæргълæууæг Сергей Меняйло, афтæмæй, университеты, хицаудзинады оргæнты минæвæрттæ, Ахуырбегæн йæ бинонтæ, йе ‘мкусджытæ, студенттæ.
– Ацы цау хуымæтæг нæу, æмæ ныхас канд бюст байгом кæныныл нæ цæуы. Уый у стыр кады нысан, нæ цытджын, нæ зондджын хистæры уæлдай хатт æрымысын æмæ йын йæ кад æмæ йæ ном ноджы бæрзонддæр сисыны нысан, – загъта Сергей Меняйло.
Ахуырбег райгуырд 1936 азы 30 октябры Дыгуры районы Дур-Дуры хъæуы. Йæ царды 30 азы снывонд кодта педагогон архайдæн, уыдонæй 20 азæй фылдæр – Цæгат Ирыстоны паддзахадон университетæн æмæ дзы ацыд фæрнджын æмæ æнтыстджын фæндагыл – райдыдта хистæр наукон кусæйгæй æмæ схæццæ профессоры онг.
1990 азы Ахуырбег æвзæрст æрцыд университеты ректорæй, 2006 азæй йæ царды фæстаг бонтæм та уыд йæ президент. Университеты сæргъы цалынмæ лæууыд, уæдмæ рауагъта 38 мин специалистæй фылдæр. Уыцы азты университеты байгом æмæ кусын райдыдта, Цæгат Ирыстоны фыццаг чи уыд, диссертацион уыцы совет.
Дунеон дыууæ академийы академик, Ахуырады Уæрæсейы академийы уæнг-уацхæссæг, уыцы иу рæстæг Ахуырбег уыд Уæрæсейы Адæмты ассоциацийы правленийы, ЮНЕСКО-йы хъуыддæгты фæдыл Уæрæсейаг къамисы æмæ Уæрæсейы Ректорты цæдисы уæнг дæр.
Йæ фæрнджын æмæ æнтыстджын фæллойы тыххæй Ахуырбег хорзæхджын æрцыд Фæллойы Сырх Тырысайы орденæй æмæ «Фыдыбæстæйы раз сгуыхтдзинæдты тыххæй» III æмæ IV къæпхæнты ордентæй. Уыд Цæгат Ирыстоны Наукæ æмæ техникæйы сгуыхт архайæг, литературæйы къабазы Хетæгкаты Къостайы номыл Паддзахадон премийы лауреат.
Зындгонд ахуыргонд йæ цардæй ахицæн 2025 азы 7 декабры.
Боны дæргъы Цæгат Ирыстоны паддзахадон университеты цыдысты ахуыргондæн йæ цард æмæ наукон æмæ педагогон архайдимæ баст номарæн мадзæлттæ. ЮНЕСКО-йы залы та арæзт æрцыд Ахуырбеджы номимæ баст цæлхæмбырд «Великое служение науке, образованию, народу».
ДЕДЕГКАТЫ Зæлинæ
