Ацы бонты номдзыд ирон курдиатджын поэт, прозаик, рухстауæг Малиты Георгийы райгуырды 140 азы бонмæ бирæ мадзæлттæ арæзт цæуы.
Фыццаджыдæр, арæзт æрцыд Дунеон наукон-практикон конференци, æрбахуыдтой йæм æмæ нæ республикæмæ æрæмбырд сты ахуыргæндтæ, фысджытæ, политиктæ, æмæ æхсæнадон архайджытæ Мæскуыйæ, Абхазæй, Цæцæны, Кæсæг-Балхъары республикæтæй, Цæгат æмæ Хуссар Ирыстонæй, скодтой дзы арф мидисджын докладтæ.
Конференци саразыныл зæрдиагæй бацархайдтой Цæгат Ирыстоны Наукон библиотекæ æмæ Уæрæсейы Патрис Лумумбайы номыл Адæмты хæлардзинады университет.
Йæ архайджытæн зæрдиаг арфæ ракодта РЦИ-Аланийы Парламенты Сæрдар, экономикон наукæты доктор, профессор Тускъаты Таймураз, стæй ма сæрмагондæй бузныг загъта, ацы хъуыддаг кæй хъæппæрисæй сырæзт, уыдонæн. Парламенты Сæрдар сын ратта арфæйы фыстæджытæ æмæ грамотæтæ. Тускъайы-фырт дзырдта поэты хæдхуыздзинадыл, йæ поэзийы егъау ахадындзинад æмæ йе стыр æхсæнадон архайдыл йæ адæмы хорздзинадæн.
Малиты Георгийы цард æмæ сфæлдыстадыл мидисджын докладтæ скодтой Цæгат Ирыстоны Абайты Васойы номыл Гуманитарон æмæ социалон иртасæнты институты зонадон кусæг, филологон наукæты кандидат Мамиаты Изетæ, журнал «Ирæф»-ы сæйраг редактор, зындгонд поэт, прозаик Скъодтаты Эльбрус, филологон наукæты доктор Тахъазты Федар.
Цыппæрæмы та Цæгат Ирыстоны Тæбæхсæуты Балойы нормыл Ирон академион театры уыд Малиты Георгийы юбилейон номарæн изæр. Амыдтой йæ РЦИ-Аланийы адæмон артисткæ Сечъынаты Альбинæ æмæ Скъодтаты Рафаэль. Дыгурон театры зындгонд æмæ æрыгон артисттæ Хъараты Алик, Хъалабегты Фатимæ, Габеты Хетæг, Даситы Ирбег æмæ Дæгуыйты Фатимæ Малиты Георгийы цард æмæ сфæлдыстадон уацмыстæм гæсгæ бацæттæ кодтой æмæ равдыстой зæрдæагайгæ сценикон нывтæ.
Номарæн изæры ма архайдтой Цæгат Ирыстоны паддзахадон филармонийы адæмон инструментты оркестр, йæ разамонæг æмæ дирижер – Хуссар æмæ Цæгат Ирыстоны сгуыхт артист Ходы Олег, Мариинаг театры дзæуджыхъæуккаг филиалы ирон адæмон зарæггæнджыты къорд, зындгонд музыканттæ æмæ зарæггæнджытæ Сечъынаты Элитæ, Золойты Заремæ, Хуытъиаты Беллæ, Сидахъаты Азæмæт, Езеты Игорь. Азарыдысты Георгийы номыл зарджытæ æмæ йе ‘мдзæвгæтыл арæзт вокалон уацмыстæ.
Номарæн изæр саразджытæ, уазджытæ æмæ йæ архайджытæн зæрдæбын арфæ ракодта Малиты Георгийы фырт Мурат.
ГАПБАТЫ Алетæ
