Нӕ бӕстӕ фидар цӕмӕй уа ӕмӕ размӕ цӕуа, уымӕн ахъазгӕнӕг Уӕрӕсейы Федерацийы Президенты уынаффӕтӕй иу у «2024 азмӕ Уӕрӕсейы Федерацийы разты ахсджиаг хӕстӕ ӕмӕ национ нысантӕ». Уыцы нысантӕм хаст цӕуы кусӕг дӕсныйӕдтӕм скъоладзауты ӕмхиц кӕнын ӕмӕ сӕ семӕ зонгӕ кӕнын, ӕрыгон адӕймаг цӕмӕй рагацау зона, цавӕр дӕсныйад равзардзӕн, уый.
Уый фӕдыл республикӕйы Парламенты наукӕйы, ахуырады, культурӕ ӕмӕ информацион политикӕйы комитеты уӕнгтӕ, сӕ сӕргъы комитеты сӕрдар Еленӕ Князева, афтӕмӕй бабӕрӕг кодтой ӕрыдоны аграрон-технологон колледж. Уыцы бон ам райдыдтой нӕ республикӕйы регионалон чемпионат «ӕрыгон профессионалтӕ»-йы ерыстӕ. Сисамайӕджы, ӕндадзӕджы, хъӕддӕсныйы, хилдасӕджы куыст кӕныны, инженерон дизайн ӕмӕ проекттӕ кӕныны, графикон дизайны дӕсны уӕвын, хъӕууонхӕдзарадон машинӕтӕй пайда кӕнын ӕмӕ сӕ цалцӕг кӕнын, рог хӕдтулгӕтӕм кӕсын ӕмӕ сӕ цалцӕг кӕнын, уӕливыхтӕ кӕнын — ӕппӕт ацы хъуыддӕгты сӕ дӕсныдзинӕдтӕ ӕвдыстой чемпионаты архайджытӕ, ӕрыгон ахуырдзаутӕ.
Парламенты депутаттӕ ӕрзылдысты ахуырадон фӕзтыл, ныхас кодтой ерысты архайджытимӕ ӕмӕ сӕ дӕсныдзинадӕн аргъгӕнӕг эксперттимӕ. Уый фӕстӕ арӕзт ӕрцыд ӕмбырд ахӕм темӕйӕ: «Республикӕ Цӕгат Ирыстон-Аланийы скъоладзауты кусӕг дӕсныйӕдтӕм ӕмхиц кӕныны фарст: йӕ уавӕр ӕмӕ рӕзты гӕнӕнтӕ». Ӕмбырд гом кӕнгӕйӕ, Еленӕ Князева куыд загъта, афтӕмӕй ӕрыгӕтты ‘хсӕн ахӕм ерыстӕ аразын у рӕстӕджы домӕн. «Чемпионат — уый диплом нӕу, фӕлӕ ӕрыгон адӕймагӕн у бӕлвырд дӕсныйад райсынӕн замманай гӕнӕн”.
Республикӕйы ахуырад ӕмӕ наукӕйы министры хӕдивӕг Алыккаты Алан куыд радзырдта, афтӕмӕй ӕрыгӕтты ‘хсӕн кусӕг дӕсныйӕдты чемпионат аразынӕй уӕлдай ма министрад ӕххӕст кӕны ӕндӕр ахсджиаг проект дӕр — «Фидӕнмӕ билет». Ацы проект Цӕгат Ирыстон ӕххӕст кӕнын райдыдта ивгъуыд аз декабры. Уый аххӕссыд нӕ республикӕйы 125 скъолайы 6 — 11-ӕм кълӕсты ахуырдзаутыл, ӕдӕппӕт — 20 мин скъоладзауӕй фылдӕрыл. Куыд чемпионатӕн, афтӕ проектӕн дӕр йӕ нысан у ӕрыгон адӕймагӕн йе ‘ргом кусӕг дӕсныйӕдтӕм раздахын, цӕмӕй рагацау ахъуыды кӕна, йӕ цард цавӕр дӕсныйадимӕ сбӕтдзӕн, ууыл.
Ӕрыдоны аграрон-технологон колледжы директор Моурауты Алан куыд радзырдта, афтӕмӕй, фидӕны дӕсныйад рагацау ӕвзарынмӕ ӕрыгӕттӕ цӕмӕй тырной, ууыл бацархайын у ахсджиагдӕр паддзахадон хӕс. Скъоладзау хъуамӕ зона, цӕй тыххӕй ахуыр кӕны, уый, хъуамӕ йын уа царды хъӕугӕ дӕсныйад райсыны гӕнӕн. «Раздӕры азты-иу чи уыд, уыдонӕй ацы хатт чемпионат хицӕн кӕны уымӕй, ӕмӕ дӕсны кусджыты ӕмӕ амалхъом адӕймӕгты ‘хсӕн бастдзинад кӕй фенгомдӕр. Ацы аз чемпионаты архайынмӕ ӕрбахуыдтам Хуссар Ирыстоны ахуырдзауты дӕр, ӕмӕ уыдон дӕр ӕвдисынц сӕ дӕсныдзинад алы кусӕг дӕсныйӕдты», — загъта Моурауты Алан.
Ацы фарсты тыххӕй сӕ хъуыдытӕ дзырдтой: РЦИ-Аланийы профцӕдисты иугонд организацийы сӕрдар Касаты Таймураз, Цӕгат Ирыстоны паддзахадон университеты уӕлдӕр ахуырады агъоммӕйы цӕттӕгӕнӕн центры разамонӕг Мӕхъиты Людмилӕ, курдиатджын сывӕллӕттимӕ кусыны фӕдыл уӕлӕмхасӕн ахуырады регионалон центры сӕргълӕууӕг Светланӕ Иванова, ӕрыдоны 1-ӕм астӕуккаг скъолайы директоры хӕдивӕг Тамарӕ Власенко, Кировы районы ахуырады управленийы методист Богъиты Мӕдинӕ, технопарк «Кванториум»-ы разамонӕг Алексей Котец ӕмӕ иннӕтӕ.
Сӕ хъуыдымӕ гӕсгӕ, сывӕллӕтты чи бахъӕуа ӕмӕ сын царынӕн фадатаразӕг чи уа, ахӕм кусӕг дӕсныйӕдтӕм сын рагацау сӕ ‘ргом здахын канд сӕхицӕн хорз нӕ уыдзӕн, фӕлӕ ма уый у, республикӕйы, ӕппынфӕстаг, нӕ бӕстӕйы размӕцыдӕн стыр ахъаз чи фӕуыдзӕн, ахӕм фӕрӕз дӕр.
ДЕДЕГКАТЫ Зӕлинӕ
