Республикӕ Цӕгат Ирыстон-Аланийы Мыхуыры ӕмӕ дзыллон хабархӕссӕг фӕрӕзты комитет сарӕзта фыццаг ӕрвылазон республикон премийы конкурс хуыздӕр журналистон куыст — «Равзар цард!»
Дзыллон хабархӕссӕг фӕрӕзты минӕвӕрттӕ архайдтой наркотикты ныхмӕ тохы проекты. Ацы мадзал арӕзт ӕрцыд РЦИ-Аланийы наркотикты ныхмӕ тохы паддзахадон программӕйы фӕлгӕты. Нӕ республикӕйы Сӕргълӕууӕг Битарты Вячеслав наркотикты ныхмӕ тохы тыххӕй сӕрмагонд программӕмӕ бирӕ ивддзинӕдтӕ бахаста, цӕмӕй ацы тохы фӕстиуджытӕ уой бирӕ ахадгӕдӕр.
— Хъыгагӕн, ныртӕккӕ бирӕ адӕм кӕсынц Европӕмӕ, фӕзмынц ӕй. Уым парахатгонд цӕуынц рог наркотиктӕ. Фӕлӕ, куыд сбӕрӕг, афтӕмӕй Голландийы рог наркотиктӕ уӕй кӕнын куы райдыдтой, уӕд сӕ наркоманты нымӕц 300 хатты фӕфылдӕр. Уый ууыл дзурӕг у, ӕмӕ нӕй рог наркотиктӕ. Рог наркотик у фыццаг къахдзӕф мӕлӕтмӕ, сау ингӕнмӕ! Ацы преми ӕцӕгдӕр у фыццаг, фӕлӕ нӕ зӕрды ис иннӕ аз ӕй фӕфылдӕр кӕнын. Темӕ у тынг ахсджиаг ӕмӕ вазыгджын. Акӕсут-ма, цас ӕрыгон фӕлтӕр фесӕфт наркотикты аххосӕй 90-ӕм азты ӕмӕ фӕстӕдӕр. Дзыллон хабархӕссӕг фӕрӕзты хӕс у адӕммӕ уыцы хъусынгӕнинаг хӕццӕ кӕнын, цӕмӕй ахӕм ӕнӕрхъуыды къахдзӕфӕй нӕ фӕсивӕды бахизӕм. Арфӕ кӕнын, ацы преми саразыны хъуыды кӕмӕ ӕрцыд, уыдонӕн се ‘ппӕтӕн дӕр, фыццагдӕр та нӕ республикӕйы Сӕргълӕууӕг Битарты Вячеславӕн, — загъта Мыхуыры ӕмӕ дзыллон хабархӕссӕг фӕрӕзты комитеты сӕрдар Фидараты Юри.
— Уӕ бон у бӕрзонд сисын дӕр ӕмӕ ныллӕг ӕруадзын дӕр. Сымахыл стыр хӕс ӕвӕрд ис. Ныртӕккӕ цы информаци ис, уымӕ гӕсгӕ дунейы ӕрвылбон фӕзыны ног наркотикты хуызтӕ: алыхуызон цӕххытӕ ӕмӕ ӕндӕр хъылматӕ, се ‘ппӕт зындгонд нӕма сты, цавӕр фӕстиуджытӕ расайдзысты адӕймаджы ӕнӕниздзинадӕн, уый дӕр кӕронмӕ бӕрӕггонд нӕу. Фӕлӕ бӕлвырд у иу хъуыддаг: иууылдӕр зиан хӕссынц, ӕмӕ сӕ фӕсивӕды хъӕуы бахъахъхъӕнын. Куыд фылдӕр зоной, куыд фылдӕр информаци сӕм хӕццӕ кӕна, уый та аразгӕ у сымахӕй, журналисттӕй, — загъта кадджын мадзалы уазӕг, Республикӕйы наркологон диспансеры разамонӕг Газайты Алыксандр.
Конкурсы сӕйраг хӕс у электрон ӕмӕ мыхуыры дзыллон хабархӕссӕг фӕрӕзты разӕнгард кӕнын наркотикты ныхмӕ тохы тематикӕйыл бӕстондӕрӕй ӕмӕ алывӕрсыгдӕрӕй кусынмӕ. Ӕдӕппӕтӕй конкурсы архайдтой 11 куысты.
Номинаци «Наркотикты ныхмӕ тохы тыххӕй хуыздӕр ӕрмӕг» преми райста газет «Северная Осетия»-йы сӕрмагонд уацхӕссӕг Гӕцойты Наталья.
Номинаци «Наркотикты ныхмӕ тохы тыххӕй хуыздӕр электрон ӕрмӕг» преми райста Национ телеуынынад «Осетия-Иристон»-ы уацхӕссӕг Плиты Хетӕг.
Номинаци «Наркотикты ныхмӕ тохы тыххӕй хуыздӕр ӕрмӕг дзыллон хабархӕссӕг фӕрӕзты» преми ӕмӕ 100 мин сомы грант райста газет «Слово»-йы сӕйраг редактор Олисаты Альбинӕ.
Хъойбайты Галинӕ
Къам систа Къӕбысты Харитон
