Коронавирусӕй рынчынтӕн Дзӕуджыхъӕуы ӕрбынӕттонуӕвӕг Республикон эндокринологон диспансеры бындурыл кӕй сарӕзтой, Хуссайраг ӕфсӕддон зылды медиктӕ уыцы 100-бынатон ӕнӕштатон инфекцион хайадмӕ цӕуӕг адӕмы исын райдыдтой.
Уӕлӕмхасӕн сынтӕджытӕ амынд диспансеры рагӕй хъавыдысты ӕрӕвӕрынмӕ. Дзӕбӕхгӕнӕндон бахастой коронавирусӕй рынчынтӕн сынтӕджыты фонд фӕуӕрӕхдӕр кӕныны пъланмӕ.
Ӕнӕштатон инфекцион хайады сӕйрагдӕр кусынц 412-ӕм ӕфсӕддон госпитӕлы медиктӕ. Уымӕй уӕлдай, цӕгатирыстойнӕгты санитарон-эпидемиологон фӕрныгадӕн фадӕттӕ аразынмӕ ӕрбахуыдтой Хуссайраг ӕфсӕддон зылды ӕфсӕддон хӕйтты ӕмӕ С.М. Кировы номыл ӕфсӕддон-медицинон академийы медикты. Ацы специалисттӕ ифтонггонд сты нырыккон ахъаззаджы кусӕнгӕрзтӕй — рӕуджыты кӕнгӕ вентиляцийы аппараттӕй, туджы анализатортӕ, клиникон иртӕстытӕн лаборатори, дезинфекцион душ ӕмӕ цӕугӕ рентгенон кусӕнуатӕй.
— Ног коронавирусон низӕфтауӕджы диагноз кӕмӕн бавдыстой, ахӕм фыццаг рынчынты исын райдыдтам. Сӕдӕбынатон инфекцион хайад кусы штатон уагӕй, — загъта амынд госпитӕлы хицау, медицинон службӕйы дӕлбулкъон Аркадий Смольников.
Цӕгат Ирыстоны Сӕргълӕууӕджы хӕстӕ рӕстӕгмӕ ӕххӕстгӕнӕг Сергей Меняйло бӕстӕйы хъахъхъӕнынады министр, ӕфсады инӕлар Сергей Шойгумӕ куы бахатыд, уӕд Хуссайраг ӕфсӕддон зылды специалисттӕ рахастой нӕ республикӕйы цӕрӕг адӕмӕн медицинон ӕххуыс бакӕныны уынаффӕ.
Нӕ уацхӕсӕг
