Республикæ Цæгат Ирыстон-Аланийы уыд Куыстдæттыны æппæтуæрæсеон армукъа «Работа России. Время возможностей».
Куыстагурджытæ æмæ куыстдæтджытæн у хорз хабар, уый тыххæй æмæ ацы армукъайы фæрцы ссарæн ис, зæрдæмæ тынгдæр кусын цы къабазы цæуы, ахæм. Куыстдæттæгæн та – йæхицæн кусæг ссарын æмæ йын радзурын, цавæр дæсныйады бынæттæ йæм ис, уыдоны тыххæй.
Армукъайы архайдтой Дзæуджыхъæуы 40 куыстдæттæджы, куысты бынæттæ та уыдысты 1659. Уыд дзы æнæниздзинад хъахъхъæнынад, ахуырад, социалон, арæзтад, лæггæдтæ дæттыны, административон-хæдзарадон куысты къабæзтæ. Куыд фæбæрæг кодтой, афтæмæй кусджытæ фылдæр хъæуы æнæниздзинад хъахъхъæнынады къабазы.
Цæгат Ирыстоны армукъа цыд Дзæуджыхъæуы Национ музейы, Цæгат Ирыстоны Размæцыды профессионалон цæттæдзинады центры, Æрыдон æмæ Мæздæджы дæр.
– Абон мах байгом кодтам Куыстдæттыны æппæтуæрæсеон армукъа. Ацы хъуыддаг у пайдайаг, ис дзы ссарæн бирæ алыхуызон куыстытæ, æрбацæуæг адæмæн сæ бон у æркæсын, бафæрсын, цымыдисагдæр сæм цы фарс-
татæ кæсынц, уыдонæй. Абон æмæ уымæй размæ фæсивæдæн цы профориентацион экскурситæ арæзт æрцыдысты, уыдон сын æххуыс сты, цы дæсныйад сæ фæнды равзарын, уый сбæлвырд кæнынæн, – загъта Цæгат Ирыстон-Аланийы Адæмæн куыстдæттыны комитеты сæрдар Цъæхилты Чермен.
Армукъайæн йæ сæйраг нысан у, куыст чи агуры æрмæст, уыцы адæмæн цыбыр рæстæгмæ баххуыс кæнын нæ, фæлæ ма сын сæ фидæны хуыздæр фæндæгтæ бацамонын дæр.
Æрбацыд æм алы кары адæм, студенттæ æмæ хистæртæ дæр. Фæсивæдæн пайда сты ахæм армукъатæ, ныридæгæн дзы бирæтæ равзæрстой зæрдæмæдзæугæдæр куысты бынæттæ, бæлвырд чи нæма зоны цы къабазы йæ фæнды кусын, уыдон дæр сæхицæн снысан кæндзысты фидæны куысты бынат.
– Æз ардæм æрбацыдтæн куыст ссарынмæ, ахуыры фæстæ мын вæййы рæстæг. Тынг бирæ алыхуызон дæсныйæдтæ дзы федтон. Институты нын куы загътой, ахæм армукъа кæй уыдзæн, уæд ме ‘мбæлттимæ сцымыдис стæм, куы æрбацыдыстæм, уæд фæдис кодтам, цæй бирæ адæм дзы ис, зæгъгæ. Хæххон машинæты инженеры дæсныйадыл ахуыр кæнын æмæ мæ зæрдæ дарын, абон кæй ссардзынæн ам куыст мæхицæн, – загъта Цæгат Кавказы хæххон-металлургон институты студент Козаты Алан.
Ахæм армукъа цæуы дыууæ къæпхæнæй, ныр уыд регионалон, дыккаг федералон къæпхæн та уыдзæн фæстæдæр.
Кæронбæттæны уыд цæлхæмбырд адæмы куыстдæттыны фарстаты фæдыл.
Армукъа бабæрæг кодта РЦИ-Аланийы Хицауады Сæрдар Дзанайты Барис.
Цæгæраты Эльмирæ
