Нæ республикæйы Рахизфарсы районы Зæронд Бæтæхъойыхъæуы Советон Цæдисы дыууæ хатты Хъæбатыр Плиты Иссæйы номыл астæуккаг скъолайы уыд ацы хъæуæй рацæуæг ном-дзыд æфсæддонтæ, Советон Цæдисы Хъæбатыртæ Бзарты Георги, Ходы Константин æмæ Æфсады инæлар, Советон Цæдисы дыууæ хатты Хъæбатыр, Монголы Адæмон Республикæйы Хъæбатыр Плиты Иссæйы номарæн изæр «Ирыстоны хъæбатыртæ – Фыдыбæстæ хъахъхъæнджытæ».
Йæ саразыны хъæппæрис равдыстой Фыдыбæстæйы Стыр хæсты Уæлахизы 80 азы кадæн нæ республикæйы Фысджыты цæдис, Хетæгкаты Къостайы номыл национ рухсадон-культурон центр, æхсæнадон респуб-ликон змæлд «Иудзинад», Рахизфарсы районы бынæттон хиуынаффæйады администраци, Бæтæхъойы хъæуы бынæттон администраци æмæ скъолайы коллектив.
Архайдтой дзы Рахизфарсы районы бынæттон хиуынаффæйады админист-рацийы, æфсæддон комиссарады, «Стыр Ныхас»-ы, районы Ветеранты советы разамынд, Бæтæхъойыхъæуы администрацийы бæрнон кусджытæ, сæрмагонд æфсæддон операцийы архай-джытæ, хъæуы цæрджытæ, скъолайы разамынд, ахуыр-
гæнджытæ æмæ ахуыр-
дзаутæ.
Номарæн æмбырды райдайæны азæлыдысты Уæрæсе æмæ Цæгат Ирыс-тон-Аланийы паддзахадон гимнтæ. Уый фæстæ скъоладзаутæ Къубалты Айнæ æмæ Ходы Самирæ ра-дзырдтой се ‘мхъæуккаг хъæбатыртæ Плиты Иссæ, Бзарты Георги æмæ Ходы Константины цард æмæ æфсæддон сгуыхтдзинæдты тыххæй. Сæ раныхæсты фæбæрæг кодтой, Бæтæхъойыхъæуæй Фыдыбæс-тæйы Стыр хæсты кæй архайдта 317 лæппуйы. Сæ райгуырæн къонатыл дзы нал сæмбæлд 175 сæрæнгуырды. Уæлахизы боныл та дзы сæмбæлд æмæ хъæумæ æрцыдысты 142 æфсæддоны.
Номарæн æмбырды архайджытæ æмæ уазджытæ сын сæ ном ссардтой, иу минут æдзæмæй алæугæйæ.
Плиты Иссæ, Бзарты Георги, Ходы Константин æмæ ацы хъæуæй рацæ-
уæг фæсивæд цы лæгдзинад равдыстой, уый Бæтæхъойыхъæуы абоны фæсивæдæн у намыс æмæ æхсардзинады стыр дæнцæг. Ныртæккæ дæр сæрмагонд æфсæддон операцийы хæстæ ацы хъæуы фæсивæдæй фæзминагæй æххæст кæнынц 18 цæхæрцæст лæппуйы.
– Уæ хъæуæй æртæ хъæбатыры – Плиты Иссæ, Бзарты Георги æмæ Ходы Константин кæй рацыд, уый у, арæх чи нæ сæмбæлы хъæуты истори æмæ адæмы царды, ахæм цау, стæй, Бæтæхъойыхъæуы цæрджытæ Фыдыбæстæйы Стыр хæсты рæстæг стыр лæгдзинад кæй равдыстой, уый бæрæг у, тохы цæхæрмæ дзы цал лæппуйы ацыд, фæстæмæ дзы чи нал ссыд, стæй, йæ райгуырæн уæзæгыл дзы чи сæмбæлд хæстон фæсивæдæй, уыцы нымæцтæй. Уымæ гæсгæ, номарæн æмбырд ацы хъæуы саразын уыд нæ иумæйаг фæнд, стæй ма нæ фæнды сæрмагонд курдиат Уæрæсе, Республикæ Цæгат Ирыстон-Алани æмæ Паддзахадон Думæйы разамындмæ арвитын, цæмæй Бæтæхъойыхъæуæн лæвæрд æрцæуа «Æфсæддон намысы хъæу»-ы кадджын ном, – загъта йæ раныхасы Хетæгкаты Къостайы номыл национ культурон-рухсадон центры разамонæг, профессор Æлборты Иван.
Номарæн æмбырды ма раныхас кодтой Фысджыты цæдисы сæрдар, литературæиртасæг Хозиты Барис, хъæуы кадджын хистæртæ Куыдзаты Уырысхан, Бигъаты Тамерлан æмæ Дзодзиаты Цæра. Уый ма аив акодта инæлар Плиты Иссæйы зарæг дæр.
Хъæуы скъолайы ахуыр-дзаутæ Гасанты Ларисæ, Дауыраты Чермен æмæ Добаты Миленæ бакастыс-ты Фыдыбæстæйы Стыр хæсты темæйыл фыст ирон поэтты æмдзæвгæтæ, равдыстой сæ арæхстдзинад ирон уæздан кафты.
Зындгонд зарæггæнæг, нæ республикæйы адæмон артисткæ Дзахоты Зæлинæ уазджытæ æмæ фысымты зæрдæтæ барухс кодта йæ вокалон зæрдæагайгæ курдиатæй.
Номарæн изæры кæрон йæ саразджытæ æмæ кадджын уазджытæн арфæ ракодта хъæуы администрацийы сæргълæууæг Цъыккаты Артур.
Мысæн изæры кæрон Бæтæхъойыхъæуы астæу сæ хъæбатыр хæстонтæ Плиты Иссæ, Бзарты Георги æмæ Ходы Константинæн цы цыртдзæвæн-бюстытæ ис, уыдоныл уазджытæ æмæ фысымтæ сæвæрдтой дидинджытæ.
ГАСАНТЫ Валери
