Ацы бонты Цæгат Ирыстоны уазджытæ сты Ханты-Мансийы автономон зылды (Юграйы) хицаудзинады оргæнты кусджытæ æмæ æхсæнадон иугæндты минæвæрттæ. Делегацийы уæнгтæ сæрмагонд ахуырадон программæйы фæлгæты зонгæ кæндзысты республикæйы хицау-дзинады оргæнтæ æмæ муниципалитетты куыс-ты фæлтæрддзинадимæ, æрдзурдзысты дыууæ регионы фидæны æмгуыстады фарстатыл.
Ахуырадон программæйы фыццаг бон Ирыстоны уазджытæ бабæрæг кодтой Дзæу-джыхъæуы бынæттон хиуынаффæйады администраци. Фысымты номæй ханты-мансийаг делегацийы уæнгтæн зæрдиаг салам загъта горæты разамонæг Милдзыхты Вячеслав.
«Дзæуджыхъæуæн хъæздыг истори æмæ хæдбындур культурæ ис, нæ горæты сæйрагдæр хæзна та йæ цæрджытæ сты. Мах кæрæдзийы нымайæм – кад кæнæм хистæртæн, аудæм кæстæртыл, – йæ арфæйы ныхасы загъта Милдзыхы-фырт. – Æхсызгон нын у абон сымах суазæг кæнын. Мæ зæрдæ дарын, уæ балц нæ дарддæры æнгом ахастдзинæдтæн хорз бындур кæй фæуы-дзæн, ууыл».
Семинары архайджытæ базонгæ сты горæты администрацийы структурон дæлхайæдты куыстимæ. Фæстæдæр та сын фысымтæ экскурси сарæзтой Дзæуджыхъæуы цымыдисагдæр бынæттыл: Хетæгкаты Къостайы номыл фæлладуадзæн паркыл, Евгений Вахтанговы номыл аллейыл, æндæр зæрдылдарæн бынæттыл.
Милдзыхты Вячеслав уазджытæн радзырдта, горæты æрвылбоны царды фарстатыл администраци куыд кусы, фыццаградон национ проекттæ куыд æххæстгонд цæуынц, æхсæнадон фæлладуадзæн бынæтты фæлгонцад куыд аивдæр кæны, æппæт уыдæтты тыххæй…
Ханты-мансийаг делегацийы уæнгтæ Ирыстоны уыдзысты къуырийы кæронмæ. Сæ балцы программæйы ис ахуырадон семинартæ, лекцитæ, æндæр фембæлдтытæ.
КАЛМАНТЫ Аслан
