«Информацион тыгъдады терроризмы идеологимæ ныхмæлæудыл æмæ экстремизм ма ’руадзыныл алывæрсыг куыст: уæрæсейаг æмæ фæсарæйнаг фæлтæрддзинад, ног фæрæзтæ æмæ хатдзæгтæ» – ахæм темæйыл наукон-практикон конференци цæуы ЦИПУ-йы. Йæ саразджытæ – РЦИ-Аланийы Национ политикæ æмæ æддагон бастдзинæдты министрад æмæ Цæгат Ирыстоны паддзахадон университет.
Уæрæсе бирæнацион паддзахад кæй у, уымæ гæсгæ дзы фæзыны ныхмæлæудтытæ, историон, социалон-экономикон æмæ политикон разæууæлтæ кæмæн ис, ахæмтæ. Уыдоны фæстиуджытæ та сты терроризм, экстремизм, æхсæнад æмæ паддзахадæн тæссаг чи у, ахæм фæзындтытæ, уымæн æмæ, сæхи сæрмагонд идеологимæ гæсгæ, сæдæ, мингай адæмты сæртæ «разилын» кæнынц. Кæд комкоммæ нæ, уæддæр нырыккон информацион фæрæзты æххуысæй сæ ардауæн митæ кæнынц нацитæ æмæ динты ныхмæлæуды.
Ацы æмæ æндæр цымыдисаг фарстатыл ныхас цыд наукон-практикон конференцийы.
Байгом æй кодта Координацион центры разамонæг, философи æмæ политологийы кафедрæйы сæргълæууæг, профессор Дзæхаты Ларисæ.
Конференцийы архайджытæн, сæ фылдæр студенттæ, арфæйы ныхæстæ загъта нæ республикæйы национ политикæ æмæ æддагон бастдзинæдты министр Бæгъиаты Алан. Йæ хъуыдымæ гæсгæ, Уæрæсейы хъомыс, йæ экономикон рæзт къухы бафтдзысты æхсæнады, сабырдзинад, хæлар ахастдзинæдтæ куы уа, æрмæстдæр уæд. Ныртæккæ – ралæууыд аразгæ интеллект, телефонтæ æмæ информацион технологиты æнус, уымæ гæсгæ уæлдай фылдæр æргом аздахын хъæуы удварн æмæ миддунейы хъæздыгдзинадмæ. Паддзахадон университет стыр æвæрæн хæссы ацы хъуыддагмæ, фæсивæдимæ кусгæйæ, аразы ахуырадон æмæ практикон семинартæ, раст фæндагыл сæ æвæры. Уырны мæ, нæ конференцийы куыст æнтыстджын кæй уыдзæн, – загъта министр.
Терроризмы идеологимæ ныхмæлæуд куыд ахсджиаг у, уæлдайдæр та – рæзгæ удты миддуне бахъахъхъæнынæн, уый тыххæй загъта ЦИПУ-йы проректор, профессор Тенгиз Тиникашвили æмæ фæсидтис ахуырдзау чызджытæ æмæ лæппутæм, цæмæй къæрцхъус уой, куыдфæндыйы цæстæй ма кæсой, интернеты тыгъдады сын цы
ардауæн, ныхмæлæууæн ныхæстæ кæнынц, уыдонмæ.
РЦИ-Аланийы Сæргълæууæджы цур Терроризмы ныхмæ къамисы нымæрдар Вадим Лесь куыд загъта, афтæмæй бирæ аразгæ у, кæстæртæ цы бинонты, цы хистæрты ’хсæн хъомыл кæнынц, уыдонæй.
– Мæхи фæлтæрддзинадæй йæ зонын, иу азæй иннæмæ неонацизмы ныхмæлæуды æмæ æртхъирæнты хуызтæ кæй ивынц, æрыгæтты сæрызондмæ æнцондæрæй хæццæ кæнынц. Æрмæстдæр иумæйаг хъарутæй ныхкъуырд раттæн ис уыцы тыхæн, – загъта Вадим.
Конференцийы цымыдисаг докладтæ скодтой историон наукæты доктор Дудайты Альберт, иннæ ахуыргæндтæ.
Гугкаты Жаннæ,
къамтæ систа Татьянæ ШЕХОДАНОВА
