Фарныхъæуы рæвдауæндоны сабитæ сæ хъомылгæнæг Дзæхаты
Маринæйы разамындæй архайдтой акци «Фыстæг æфсæддонмæ»-йы. Скодтой нывтæ, сæ ныййарджыты æххуысæй бацæттæ кодтой фыстæджытæ сæрмагонд æфсæддон операцийы архайджытæм. Арфæ кодтой нæ хъæбатыртæн, сæ амондджын сабидуг сын кæй хъахъхъæнынц, уый тыххæй.
Уыцы фыстæджытæ нæ хæстонтыл, куыд алы хатт, сæмбæлын кæны сæ амалхъом хъæуккаг Дауыраты Витали. Уый йæхæдæг æрæмбырд кæны æмæ аласы не ’фсæддонтæн, ахсджиагæй сæ цы хъæуы, уыдæттæ – хæдтулгæтæ, мотоциклтæ, ивæн хæйттæ, генератортæ, квадрокоптертæ, дон, адджинæгтæ, цæхджынтæ, стæй, æнæмæнг, ирон уæливыхтæ æмæ цыхт. Ахæм гуманитарон æххуыс Витали арвыста 20 хатты.
Цытджын Уæлахизы бæрæгбоны хæд размæ та Витали арвыста нæ хæстонтæн алы фæндæгтыл цæуæг æртæ хæдтулгæйы (внедорожник) æмæ иу уæзласæн хæдтулгæ, аст мотоциклы æмæ дæс генераторы – æдæппæт дæс милуан сомы аргъ. Зындгонд æфсæддон тæхæг Дауыраты Илитæйы ном чи хæссы, уыцы аллеяйы цы æмбырд уыд, уым Дауыраты Виталийæн арфæйы ныхæстæ загътой Рахизфарсы районы администрацийы сæргълæууæг Фрайты Сослан, депутат Гуытъиаты Вячеслав, Фарныхъæуы администрацийы сæргълæууæг Гæлуаты Зауырбег, хъæубæсты хистæртæ, Цæгат Ирыстоны сгуыхт артисттæ Дауыраты Эдуард, Тайсауты Олег æмæ Виктория Кузьминова. Кадджын мадзалы рæстæг æвзонг æфсæддонты рæнхъытæм райстой бынæттон скъолайы фæндзæм къласы ахуыргæнинæгты.
Рæвдауæндоны хъомылгæнинæгтæ кастысты æмдзæвгæтæ, зарыдысты хæстон зарджытæ. Уæлдай тынгдæр адæмы зæрдæмæ фæцыд, Виталийы цоты цотæй иу, цыппараздзыд Дауыраты Амелия зарæг «Смуглянка» куыд акодта, уый.
Фæстæмæ Витали йемæ сласта хæстонты фыстæг-дзуаппытæ Фарны æвзонг цæрджытæн.
Мах, Фарныхъæуы рæвдауæндоны хъомылгæнджытæ, сабиты ныййарджытæ æмæ йæ хъомылгæнинæгтæ, ноджы ма иу хатт стыр бузныг зæгъæм уый тыххæй Дауыраты Виталийæн!
Фыдыбæстæйы Стыр хæстмæ Фарныхъæуæй ацыд 550 адæйма-
джы, уыдонæй 214 фæстæмæ нал сыздæхтысты.
ПУХАТЫ Жаннæ
