Номарæн æмæ хъыджы бон Бетъырбухы Мариинаг театры цæгатирыстойнаг филиалы сценæйы азæлыд оперæ «Зори здесь тихие».
Борис Васильевы зæрдæмæхъаргæ кадæгмæ гæсгæ композитор Кирилл Молчановы фыст амынд уацмыс æвдисы Райгуырæн бæстæйы сæраппонд цард нывондæн æрхæссæг чызджыты хъæбатырдзинад. Оперæйы аивадон разамонæг у Уæрæсейы адæмон артисткæ Гергиты Ларисæ.
Афæдз раздæр – уый дæр уыд Номарæн æмæ хъыджы бон – филиалы сценæйы амынд оперæ фыццаг хатт равдыстой. Александр Маскалин кæй режиссер у, амынд бонæй фæстæмæ советон æфсæддонты сгуыхтдзинадыл дзурæг спектакль Оперæ æмæ балеты Театры сценæйы цалдæр хатты равдыстой.
Филиалы солисттæ Вадим Федотов, Виктория Ястребова, Маринæ Нетребина, Еленæ Скалдина, Нартыхъты Ланæ, Кокуаты Хадизæт, Пæррæстаты Альдæ, Светланæ Артеменко, Полинæ Ковтун, Остъаты Ангелинæ, Икъаты Маргаритæ æмæ Тедеты Арсен сæ рольтæ иттæг дæсны ахъазыдысты.
Дирижер Юрий Демидовичы разамындæй симфонион оркестр уацмыс парахат музыкалон зæлтæй саив кодта.
Æлборты Зæлинæ
