Уæрæсейы национ гвардийы сæргълæууæг Виктор ЗОЛОТОВ регионмæ кусæг балцы рæстæг фембæлд Курскы облæсты губернаторы хæстæ рæстæгмæ æххæстгæнæг Александр ХИНШТЕЙНИМÆ. Иумæ архайдтой Уæрæсейы Хъæбатыр ТЫБЫЛАТЫ Мараты номхæссæг Курскы кадетты корпусы арæзтад райдайыны кадджын мадзалы. Бæстыхай арæзт кæм æрцæудзæн, уым зæрдылдарæн дур æвæрд æрцыд.
Виктор Золотов æмæ Александр Хинштейн базонгæ сты фидæны ахуырадон кусæндоны территориимæ æмæ йæ проекттимæ. Кадетты училищæйы иумæйаг фæзуат уыдзæн 60 мин квадратон метрæй уæлæмæ. Уыдзæн дзы ахуырадон корпус 350 ахуырдзауæн, дыууæ цæрæн æмæ иу спортивон корпусы.
Дур сæвæрыны кадджын мадзалы фæстæ æфсады инæлар Виктор Золотов æмæ Александр Хинштейн дидинджытæ сæвæрдтой цыртдзæвæныл «Памяти павших». Уыцы ран Фыдыбæстæйы Стыр хæсты хъæбатырты фарсмæ ныгæд сты сæрмагонд æфсæддон операцийы хъæбатыртæ дæр.
Уый фæстæ Курскы облæст æмæ Уæрæсейы Федерацийы национ гвардийы æфсæдты федералон службæ æмгуыстады Бадзырд бафыстой. Документ нысан кæны патриотон хъомылады, кадртæ цæттæ кæнын æмæ инфраструктурæ райрæзын кæныны æмархайды бындуртæ.
Виктор Золотов Курскы облæсты бабæрæг кодта ведомствæйы регионалон управлени æмæ йæ кусджыты базонгæ кодта сæ ног разамонæг – пъæлицæйы инæлар-майор Евгений Панковимæ.
Æфсады инæлар, Уæрæсейы Хъæбатыр Виктор Золотов куыд бафиппайдта, афтæмæй Курскы облæсты Уæрæсейы национ гвардийы управленийы ног разамонæг æфсæддон æмæ разамынд дæттыны у фæлтæрд. Уыцы фæлтæрддзинæд Курскы облæсты абон тынг хъæуы.
Виктор Золотовæн регионы разамонæджы хæстæ рæстæгмæ æххæстгæнæг Александр Хинштейнимæ фембæлды рæстæг ныхас кодтой регионы цæрджыты æдасдзинад æмæ,
контртеррористон операцийы хæстæ æххæст кæныны фæлгæты, Уæрæсейы национ гварди æмæ хицаудзинады оргæнты минæвæрттимæ æмархайды фарстатыл.
Æфсады инæлар, Уæрæсейы Хъæбатыр Виктор Золотов арфæ ракодта Александр Хинштейнæн, Курскы облæсты сæ хæстон хæстæ æххæстгæнæг Уæрæсейы национ гвардионтæн æххуыс кæй кæны, уый тыххæй. Александр Хинштейн та зæрдæ бавæрдта, регионы разамынд дарддæр дæр уыцы æххуыс кæй кæндзæн, уымæй.
Уæрæсейы национ гвардийы æфсæдты РЦИ-Аланийы управленийы
пресс-службæ
