Дзæуджыхъæуы администрацийы цы æхсызгон фембæлд сарæзтæуыд, уым кадджын уавæрты сæ царды бындурондæр документ – паспорттæ райстой Цæгат Ирыстоны сæйраг горæты æвзонг цæрджытæ.
Фембæлд арæзт æрцыд Уæрæсейы Адæмон иудзинады боны кадæн, йæ сæйрагдæр архайджытæ та систы Фыццæгты федералон змæлды регионалон хайады раззагдæр уæнгтæ. Уыцы бон паспорттæ райстой æдæппæт 35 лæппу æмæ чызджы.
Дзæуджыхъæуы бынæттон хиуынаффæйады администрацийы сæргълæууæ-джы хæдивæг Ходы Мæдинæ йæ 14-аздзыд æвзонг æмграждæнтæн арфæ ракодта сæ царды ацы ахсджиаг цауы фæдыл. «Сымахæй алкæмæндæр абон у æнæферохгæнгæ фембæлд. Ахæм ахсджиаг документы хицау кæй суыдзыстут, уый уын уæ зæрдæты нæ бирæнацион Фыдыбæстæйыл иузæрдиондзинад æмæ дзы сæрыстырдзинады æнкъарæнтæ кæй гуырын кæндзæн, ууыл дызæрдыг нæ кæнын. Нæ бæстæйы аккаг граждæнтæ кæй суыдзыстут æмæ уæ фидæны æнтыстдзинæдтæй мах райгонд кæй
уыдзыстæм, уымæй дæр мæ ныфс ис», – бафиппайдта горæты разамонæджы хæдивæг.
Фембæлды æрыгон архайджытæн арфæтæ ракодтой Фæсивæды хъуыддæгты фæдыл республикон комитеты сæрдар Джусойты Руслан æмæ Цæгат Ирыстоны культурæйы министры фыццаг хæдивæг Рæмонты Маринæ дæр.
Нæ уацхæссæг
