Федералон корпораци «МСП» цы нымæцон платформæ сарæзта, уый фæрцы Цæгат Ирыстоны амалхъомады къабазы компанитæ æмæ хицæн минæвæрттæ фæстаг рæстæг льготон кредитты хуызы райстой 60 милуан сомæй фылдæр.
Уый тыххæй йæ телеграм-каналы фыссы РЦИ-Аланийы Сæргълæууæг Сергей Меняйло.
Регионы разамонæджы хъуыдымæ гæсгæ, æххуысы ахæм мадзæлтты фæрцы амалхъомадон компанитæн уæрæхдæр кæнынц сæ фадæттæ, республикæйы экономикæйы уавæр хуыздæрырдæм ивы.
«Нымæцон платформæ «МСП.РФ»-йы фæрцы амалхъомтæн ис сæ ахадгæдæр проекттæ царды рауадзынæн льготон æфстæуттæ райсыны фадат. Амынд платформæйы гæнæнтæй спайда кæнгæйæ, бизнесментæн сæ кредитон курдиæттæ уыцы-иу рæстæг æрвыст цæуынц цалдæр банкмæ. Уый фæстæ банктæ амалхъомтæн фехъусын кæнынц, кредиттæ цавæр проценттыл дæттынц, стæй æндæр ахæм æууæлтæ. Амалхъомтæ æппæт уыцы бæрæггæнæнтæ куы райсынц, уæд сæхæдæг равзарынц, пайдайагдæр æмгуыстад сын кæцы банкимæ уыдзæн, уый. Уыимæ, æппæт уыцы фарстатæ лыггонд цæуынц онлайн-фæткы бындурыл, финансон организациты офистæм цæуын нæ бахъæуы. Уыцы æууæл, кæй зæгъын æй хъæуы, зынгæ фæхуымæтæгдæр æмæ фæрогдæр кæны банчы æфстау райсыны куыст», – бафиппайдта Цæгат Ирыстоны Сæргълæууæг.
Зæгъын хъæуы, ахæм нымæцон платформæ саразыныл корпораци «МСП» Уæрæсейы экономикон рæзты министрадимæ иумæ кæй бакуыста, уый дæр. Уыимæ, уыцы æмгуыстад æххæстгонд цæуы национ проект «Пайдайаг æмæ ерысхъом экономикæ»-йы фæлгæты.
Æмæ ма ахæм нымæцтæ. Информацион агентад «РИА Новости» фехъусын кодта, 2024 азы уæрæсейаг регионты амалхъомадон архайд куыд рæзыд, уый бæрæггæнæнтæ.
Афтæ, уыцы æрмæджыты куыд загъд ис, уымæ гæсгæ, Цæгат Ирыстоны мидбæстон иумæйаг продуктмæ республикæйы чысыл æмæ рæстæмбис амалхъомады компаниты иумæйаг бавæрæн хæццæ кæны 30 процентмæ. Уыимæ, регионы æппæт фæллойгæнæг адæмæн сæ 57 проценты бæрц кусынц чысыл æмæ рæст-
æмбис амалхъомады къабазы.
Республикæйы Экономикон рæзты министрады бæрæггæнæнтæм гæсгæ, уыцы амалхъомадон компанитæн сæ 24 проценты кæнынц базарад æмæ хæдтулгæты цалцæджы куыст, 14 проценты кусынц арæзтады, 12 проценты – хъæууон хæдзарады, 11 проценты – хомагкусæг куыстуæтты, 4 проценты – фысымуæттæ æмæ хойраджы кусæндæтты æмæ афтæ дарддæр…
Дмитрий АСТАХОВ
