Æнæном салдаты боны кадæн Дзæуджыхъæуы Намысы мемориалы арæзт æрцыд дзыллон патриотон акци «Дæ хъæбатырдзинад рох нæу…»
Хъæбатырты аллеймæ æрбамбырд сты РЦИ-Аланийы Национ политикæ æмæ æддагон бастдзинæдты министрады, Дзæуджыхъæуы администраци æмæ Æхсæнадон советы, Уæрæсейы Æфсæддон-историон æхсæнады цæгатирыстойнаг хайады, Хæлардзинады республикон хæдзары, 58-æм æфсад æмæ æндæр организациты минæвæрттæ.
Акцийы архайджытæ, æдзæмæй иу минут алæугæйæ, ссардтой, Фыдыбæстæйы сæрибардзинады сæраппонд йæ цард чи нæ бавгъау кодта, уыцы хъæбатырты рухс нæмттæ, дидинджытæ сæвæрдтой æдзард хæстонты цыртдзæвæнтæ æмæ ингæнтыл…
Уæрæсейы хæстон намысы бонты къæлиндары сæрмагод бынат ис 3 декабрæн – уæд æрвылаз бæрæггонд цæуы Æнæном салдаты бон. Æмæ цалынмæ ног фæлтæртæ сæ зæрдыл дарой Фыдыбæстæйыл иузæрдион хъайтарты, кад сын кæной се ’гæрон хъæбатырдзинадæн, уæдмæ цæрдзысты сæ рухс фæлгонцтæ…
Дмитрий Астахов
