Уæрæсейы Æдасдзинады федералон службæйы РЦИ-Аланийы управленийы кусджытæ рабæрæг кодтой æмæ кæрон сæвæрдтой паддзахадон кусæндæттæй иуы минæвæртты æнæзакъон архайдæн.
Слестгæнæг оргæнты кусджытæ баурæдтой Агропромышленнон комп-
лексы продукцийы хæрзхъæддзинадæн аргъгæнæг федералон кусæндоны цæгаткавказаг хайады разамонджытæй иу æмæ специалисты. Гуырысхо-
йæгты азымджын кæнынц 400 мин сомы бæрц гæртам райсынæй.
Оперативон æрмæджытæм гæсгæ, гуырысхойæгтæ баныхас кодтой республикæйы фермерон хæдзарæдтæй иуы минæваримæ, кæсагдарынады куыстад райдайыны нысанимæ йын цы зæххы хай радих кодтой, уый рекультивацийы проект саразыныл. Уыимæ, федералон кусæндоны специалисттæ сæхимæ хæс райстой, проект фермеры пайдайæн кæй сараздзысты (ома, рекультивацийы куыстытæн хъæугæ хæрдз-
тæ гæххæттыл фыстæй зынгæ кæй фæкъаддæр кæндзысты), уымæй. Æмæ æрмæст уый нæ. Фермерæн зæрдæ бавæрдтой, йæ дарддæры амалхъомадон архайды дæр ын æххуыс кæй кæндзысты, уымæй.
Амынд оперативон-агурæн æрмæджыты бындурыл УФ-йы Слестгæнæг комитеты РЦИ-Аланийы управленийы кусджытæ Уæрæсейы Уголовон кодексы 290-æм статьяйы 5-æм хайы («Гæртам райсыны цау») бындурыл гуырысхойæгты ныхмæ сарæзтой уголовон хъуыддаг.
УФ-йы Æдасдзинады федералон службæйы цæгатирыстойнаг управленийы пресс-службæ
