Республикæйы Парламенты Промышленность, транспорт, бастдзинад æмæ амалхъомады комитет сарæзта цæлхæмбырд. Амыдта йæ Парламенты Сæрдар ТУСКЪАТЫ Таймураз.
Ныхас цыд нæ республикæйы промышленносты райрæзтыл, йæ гæнæнтæ æмæ йын æххуыс кæныны фæрæзтыл. Æмбырды архайджытæ уыдысты профилон министрадтæ æмæ ведомствæты, наукон æмæ æхсæнадон организациты минæвæрттæ.
Æмбырд гомгæнгæйæ, Тускъаты Таймураз бафиппайдта республикæйы фидæнæн промышленносты ахсджиагдзинад.
– Социалон нывылдзинады бындур у промышленность. Цæгат Ирыстоны истори дæр ууыл дзурæг у: йæ рæзты алы къæпхæны дæр промышленность ахста ахсджиагдæр бынат. Демографи, царды иннæ къабæзтæ размæ ракæнын къухы нæ бафтдзæн, индустриалон æгъдауæй нæ республикæ фидар куы нæ уа, уæд, – загъта Тускъаты Таймураз.
Йæ раныхасы Парламенты Сæрдар йе ‘ргом аздæхта Ирыстоны наукон хъомысмæ, ног технологитæм æмæ бафиппайдта, хицаудзинады оргæнтæн сæ хæс кæй у технологион райрæзты нысантæ сбæлвырд кæнын, куыд хицæн куыстуæттæн, афтæ, æмткæй райсгæйæ, республикæйæн.
– Нæ уæлдæр ахуыргæнæндæтты архайынц практикон æгъдауæй
хъæугæ æмæ ахсджиаг наукон куыстытыл. Наукæ æмæ куыстад кæм баиу уы-
дзысты, хъæуы ахæм программæ, – загъта Тускъаты Таймураз æмæ æмбырды архайджытæн сæ размæ сæвæрдта хæс: промышленносты ныры уавæр бæстон равзарын æмæ закъонæвæрынады бындурыл бакусын размæцыдæн
ахъазгæнæн фæрæзтыл.
Уыцы фарстатыл уыд йæ раныхас Парламенты профилон комитеты сæрдар Киситы Муратæн. «Нæ республикæйы промышленносты райрæзты барадон бындур у «РЦИ-Аланийы промышленнон политикæйы тыххæй» закъон. Ахсджиаг у, ивгъуыд аз республикæйы Хицауад промышленносты райрæзты программæ 2030 азмæ кæй адарддæр кодта, уый», – загъта депутат, стæй ранымадта, индустриалон рæзты нысанимæ цы мадзæлттæ арæзт цæуы, уыдон. Се ‘хсæн: Промышленносты райрæзты фонды капитализаци фылдæр кæнын (ныридæгæн уый схæццæ 516,1 милуан соммæ); хъахъхъæнæн-промышленнон комплексы куыстуæттæн, къабазы кусæг сæрмагонд æфсæддон операцийы архайджытæн, хицæн иуæй-иу инвестицион контракттæн хъалонты зæрдæмæдзæугæ уавæртæ аразын; йæ промышленнон куыстад рапарахат кæнын чи хъавы, уыдонæн зæххы хæйттæ æнæ базаргæнгæйæ хаццоны дæттын æмæ æндæр мадзæлттæ.
Промышленностæн Æххуысы фонды гæнæнтæ цыбыр кæй сты, ууыл уыд йæ раныхас промышленность æмæ инвестициты министр Атараты Олегæн. Йæ хъуыдымæ гæсгæ, комкоммæ æххуыс чи кæны, ацы бонмæ уал фонд у иунæг ахæм фæрæз. «516 милуаны кæд гыццыл æхца не сты, уæддæр къабазы архайæг
куыстуæттыл не ‘ххæссы æмæ, стратегион æгъдауæй ахсджиаг бæрæггæнæнтæ къухы цæмæй бафтой æмæ индустриалон къабаз размæ цæмæй рацæуа, уымæн фаг не сты», – бафиппайдта министр æмæ дарддæр ныхас кодта инвестицион куысты бæрæггæнæнтыл. Куыд загъта, афтæмæй фæстаг æртæ азмæ фонд радта 15 æфстуæттæ иумæйагæй 506 милуан сомы бæрц. Уый фæрцы фæзынд 400 ног куысты бынаты. Фæлæ промышленносты размæцыд домы æххуысы фылдæр мадзæлттæ æмæ хæрдзтæ.
Æмбырды раныхасгæнджытæ ма уыдысты: Промышленносты райрæзты фонды директор Кокайты Эдуард, наукæ æмæ ахуырады министры хæдивæг Андрей Швецов, «Промышленниктæ æмæ амалхъомты цæдис»-ы куыстдæтджыты цæгат-
ирыстойнаг регионалон иугонды правленийы сæрдар Хъодзаты Алан,
Дзæуджыхъæуы технологион центр «Баспик»-ы генералон директор Хъулаты Сослан, наукон-куыстадон кусæндон «Токар»-ы генералон директор Бæзойты Олег. Фарстайы фæдыл сæ хъуыдытæ загътой: «Деловая Россия»-йы советы сæрдар Æбиты Раман, Парламенты бюджеты, хъалонты, исбонад æмæ кредитон организациты комитеты сæрдар Хæдарцаты Аслæнбег æмæ Цæгат Кавказы хæххон-металлургон институты ректор Хъамболты Дзамболат. Алчидæр сæ ныхас кодта, республикæйы промышленносты райрæзтæн ахъаз чи кæндзæн æмæ, алцæмæй æххæст технологион кластер республикæйы саразынæн бындур чи уыдзæн, ахæм гæнæнтæ æмæ мадзæлттыл.
Цæлхæмбырды фæдыл йæ архайджытæ рахастой хæстæгдæр азтæм индус-
триалон къабаз Цæгат Ирыстоны райрæзын кæнынæн былвырд уынаф-
фæтæ æмæ амынддзинæдтæ. Сæ иумæйаг хъуыдымæ гæсгæ, промышленносты æнтыст аразгæ у хицаудзинады æппæт оргæнтæ æмæ бизнесы æмархайдæй.
ДЕДЕГКАТЫ Зæлинæ
