Цæгат Ирыстоны дарддæр æххæстгонд цæуы, Президентон академийы регионалон минæварады специалисттæ цы программæйыл кусынц, уый. Ацы бонты программæ «Аланийы командæ: муниципалон æмвæзад»-ы архайджыты фыццаг къордæн ахицæн сты сæ ахуыртæ.
Программæйы архайæг разамонæг кусджытæ ахуырты кæронмæ цы проекттæ бацæттæ кодтой, уыдонæн аргъгæнæг уыд сæрмагонд аттестацион къамис. Йæ уæнгтæ уыдысты РЦИ-Аланийы Хицауады Сæрдар Дзанайты Барис, Президентон академийы Паддзахадон разамынды уæлдæр скъолайы директоры хæдивæг Евгений Подшивалов, республикæйы хицаудзинады æххæстгæнæг оргæнты бæрнон кусджытæ.
Амынд ахуырадон программæйыл æмхъаруйæ бакуыстой Президентон академи æмæ Цæгат Ирыстоны Хицауад. Проекты сæйрагдæр нысан у хицаудзинады республикон оргæнты кусджыты профессион дæсныдзинад бæрзонддæр кæнын, ног ахсджиаг æмæ хъæугæ зонындзинæдтæй сæ ифтонг кæнын. Лекцитæ æмæ æндæр ахуырадон семинартæй уæлдай, программæйы архайджытæн уыд, сæ муниципалитетты æмвæзадыл цы ахадгæ проекттыл бакусдзысты, уый сбæлвырд кæныны фадат дæр.
Дзанайты Барис программæйы фыццаг къæпхæны архайджытæн арфæ ракодта, сæ ахуыртæ æнтыстджынæй кæй ахицæн кодтой, уый тыххæй.
– Республикæйы æппæтвæрсыг куыст цæуы социалон-экономикон уавæр нывылдæр кæныныл, коммуналон, фæндаггон æмæ иннæ къабæзты дарддæры райрæзтыл. Æппæт уыцы ахсджиаг нысантыл куысты вазыгджын у паддзахадон æмæ муниципалон оргæнты кусджыты профессион дæсныдзинад æмæ фæлтæрддзинад. Уымæн хорз ахъаз у программæ «Аланийы командæ: муниципалон æмвæзад», – бафиппайдта Дзанайты Барис.
Ахуырты фыццаг къæпхæны бæрæггæнæнтæ бахынцгæйæ, программæйы 36 архайæгæн саккаг кодтой дæсныдзинад фæбæрзонддæр кæныны тыххæй æвдисæндартæ.
Президентон программæйы ахуыртæ цыдысты цалдæр мæйы дæргъы, лекцион æмæ практикон семинартæ йæ архайджытæн амыдтой зындгонддæр уæрæсейаг эксперттæ æмæ æндæр специалисттæ.
РЦИ-Аланийы
Сæргълæууæг æмæ Хицауады
пресс-службæ
